Ukraine inkahhai chungchangah Trump-Putin inbe dawn

Ukraine inkahhai chungchangah Trump-Putin inbe dawn
US President Donald Trump leh Russian President Vladimir Putin te chu tun kar hian an inbe dawn niin thuneituten Pathianni khan an sawi a. Washington leh Kyiv-in a thawhpui European-te chuan Moscow hi kum thum indona kalpui tawha inkahhai rawtna pawm turin na zawkin an nawr mek zel.
United States hian kar liam ta khan Saudi Arabia-a Ukraine nen an inbiaknaah inkahhai hi a rawt a, Kyiv chuan a pawm tawh.
Putin-a erawh chuan chhanna a la pe lo va, rawtna awm mekah chuan ‘ngaihtuah ngai pawimawh tak tak’ tam tak a la awm tih chauh a la sawi.
Trump-a’n buaina awm meka palaia a hman, Steve Witkoff-a chuan Putin-a pawh a dawr zui leh tawh a. Hemi hnua CNN-in an kawmna an tihchhuahah ‘president pahnihte hian inbiakna tha leh hlawk an neih a beiseiawm’ tih a sawi.
A hmain Moscow hian US Secretary of State Marco Rubio leh Russian Foreign Minister Sergei Lavrov chu inbiain thla hmasaa Saudi Arabia-a US-Russia summit-a an thil sawi tawhte a taka kalpui tura thil tih zel tha an tih thu an sawi tih a lo sawi tawh.
Ukraine President Volodymyr Zelensky-a chuan Inrinni khan Kremlin chu indo tihtawp duh lovah a puh a, ‘Moscow hian indona mualah an dinhmun siam that phawta inkahhai pawm chauh an tum’ niin a sawi bawk.
February-a Riyadh an inbiak kha Febriary, 2022 atanga Moscow-in a thenawm a rûn hnua US leh Russia aiawh mi pawimawh inbiakna hmasa ber a ni.
“Sergei Lavrov leh Marco Rubio te hi an la inbe chhunzawm reng,” tiin Russian foreign ministry chuan a sawi a, US-in inkahhai a rawtna chungchang erawh engmah an sawi lo.
State Department thupuangtu, Tammy Bruce pawhin Inrinni khan mi pawimawh pahnihte hian Ukraine chungchangah ‘kal zel dan tur’ an sawi dun tih a sawi bawk.
Lavrov-Rubio inbiak hma lawk hian UK huaihawtin Ukraine chungchanga inrawn a ni bawk a, Prime Minister Keir Starmer-a chuan Putin-a hi inkahhai chungchangah ‘a tanhmun a thlak’ niin a sawi.
“Russia atanga ‘aw; mahse,’ tih hi chu a tawk lo,” a ti a. ‘Rawng taka Ukraine a beihna chu a tawp nghal tur a ni’ tih a sawi.
A tukah Kyiv chuan Russia-in Iranian siuam Shahed drone 90 hmangin Ukrainian region pakua an bei zui tih a sawi bawk.
US-in inkahhai puan a rawt chungchangah hian Putin-a chuan Ukraine chauhvin an hlawkpui dawn niin a sawi a, tunah hian an sipaite chuan hmun tam takah hma an sawn mek niin a sawi.
Inkahhai rawt a nih mek lai hian Russia chuan Ukraine khawchhak leh chhim lama ram zau tak luah tawhin hmun dangah hma an sawn mek bawk.
Kyiv-in Russia ram chin a luah mek, Kursk region hmun thenkhat atang pawhin Ukrainian sipaite an um chhuak tawh bawk a, hma an sawn zel theih an inbeisei.
Putin-a chuan inkahhai rawtnaah hian Moscow chuan anmahni hamthat vena tur sawia phone-a Trump-a biak a tum thu a sawi.