UN General Assembly inkahhai rawt Israeli ten duh lo

Israel khua leh tuite chuan UN General Assembly-in inkahhai a rawt chungin an sipaite chuan Hamas-te an beihna chu an tawpsan tur a ni lo an ti a. Hetih lai hian Gaza ah nunna chan an pung tual tual thung.
Thawhlehni khan Israel sipai tena Gaza indona thla hnih awh tawha an casualty neih nasat ber thlengin ni khatah sipai 10 a chan a, tihian a sipai nunna chan tawh zat chu 115 lai a ni tawh.
Palestinian nunna chan 18,500 chuang an awm tawh bawk a. US President Joe Biden meuh pawhin Israel-in Gaza a bomb nasat vangin khawvel ram tena Israel an thlawpna an hloh tial tial tiin a sawi.
Chutih lai chuan Israeli mipui te chuan an sipaite chuan Hamas te an beihna tawpsan lo se an duh thung niin Reuters chuan a sawi a. Poll lakah pawh Israel mipuite chuan indona kal mek chu an thlawp tih a lang chiang hle bawk.
7 October a Hamas tena Israel run thuta mi 1,200 chuang an tihhlum khan kum 1973-a Arab ram tangrual tena Israel an beih thut a hriatchhuah tir nasa a ni tiin political scientists Tamar Hermann chuan a sawi a.
“Israel mipuite ngaihdanah chuan Israel nuaibo tumna angah an ngai a ni,” tiin Hermann, Israel Democracy Institute a thawk indona kaihhnawiha opinion poll la fo chuan a sawi a. Mipuite chuan an sipai tam tak ten nunna an chan dawn tih pawh hriain an pawm a ni tiin a sawi.
Israel mipuite ngaihdanah chuan Hamas-te beihna tawpsan a nih chuan an hmelma ten Israel chu chak lovah an ngai dawn niin an ngai tih a ni bawk a.
“He indona hi a tawp kan sikpui rat loh chuan naktuk lawkah hmar leh khawchhak leh chhim lamah emaw Iran pawhin emaw min bei zui mai ang. Duhthlan tur dan kan nei lo,” tiin retiree Ben Zion chuan a sawi a.
Vanduaina leh tihchhiat nasa hle mahse Israel sipai tena an tum ber chu Gaza-a Hamas infrastructure chhut chhiat vek a ni, tiin Knesset Foreign Affairs and Defence Committee chairman Yuli Edelstein chuan a sawi bawk.
Hamas te chuan Thawhlehnia Israel sipai an kahhlum hnuah Israel chuan indonaaa thil tum a tihhlawhtlin theih ngai dawn lohzia lanna an ti ve thung a. “In cham rei poh leh nunna chan leh hloh in ngah ting a ni mai a, inchhirin in la awm ang, Pathianin min tanpui ang,” tiin Hamas te chuan an sawi ve thung.