UN-in ZORO a hmelhriat tha Zofate rorelna hran neih duhpui

Mizoram lama mi tam takin kan ngaih thupui loh ang aiin, United Nations hotute chuan Zo Reunification Organisation (ZORO) chu an lo hmelhriat hle a, kan chhehvela chengte sakhaw zui an thlirin, Zofate chu ro inrel hrang awm takah min ngaihpui hle bawk, tiin tunhnaia UN inkhawmpuia zuk tel Lalnunfela Chawngthu chuan a sawi.
ZORO Western Zone president Lalnunfela Chawngthu hi kumin July 8-12 chhung khan Geneva-a UN Expert Mechanism on the Rights of Indigenous Peoples 17th Session-ah KH Lalruatpuii, Serchhip nen ZORO aiawhin an zu tel a. An thu thlen ber chu, tunlaia Myanmar, Manipur leh Bangladesh-a Zohnahthlakte harsatna tawn mek a ni.
Ram 700 chuang atanga ram leilung mi (indigenous) kalkhawm an ni a, thusawina hun dil vek an nih avangin minute 3 chiah thusawina hun an nei a, hemi chhung hian Zofate harsatna tawh hi a sawi tih Lalnunfela Chawngthu hian a sawi. A thusawi hian a rin phak bakin ngaihven a hlawh a, ram 6 atangin leh media mi leh Bangladesh lam kaihhnawih thesis ziak lai nei pakhat chuan rawn kalchilhin zawhna a dawng zui mawlh mawlh tih a sawi.
UN hotuten ZORO chu an lo hmelhriat hle a, helama eng he hua kan lo ngaih vak loh ang ngawt kha Geneva ah chuan a lo ni hauh lo tih a zuk hmuhchhuah thu a sawi.
Mizoram chu Hindu tamna India-a awm, chhak lamah Buddhist sakhaw zuitu Myanmar, Muslim ram Bangladesh ten a hual vel a nih angin, ‘Zo nation’ chu awmhran a mamawh nia an ngaih thu an lo hrilh tih a sawi bawk.
Vietnam indigenous atanga team lokalte chuan Zofate chanchin leh kan dinhmun an lo hre hle bawk tih sawiin, rorelna hrang nei tura hma kan lak dan chu an lo khawp kham lo hle tih an lo hrilh let zawk thu a sawi.
Ram hrang hrangin United Nations chu sustainable development atan leh thil dang dang atan an lo hmang tangkai nasa tawh hle tih a zuk hmuhchhuah thu Lalnunfela Chawngthu hian a sawi a ni.