Union budget-ah state hmasawnna atan sum haichhuah tur awmsa vek – Vanlalhmuaka

Union budget chu taka zir a, a dil dan tur dika dil chuan, Mizoram sawrkar tan a hranpaa sum zuk dil ngai loin state hmasawnna atan sum haichhuah tur a awm sa vek tih BJP Mizoram president Vanlalhmuaka chuan a sawi.
India zalenna kum 75 a tlin tawh mek lai a, India ram budget chhawr pha mumal lo mi 65-70% deuhthaw an awm chu ram hmasawn theih lohnaah ngaiin, BJP kaihhruai sawrkar chuan kum 2014 atang khan heng mite chhawr theih turin Union Budget hi siamin a tinzawn a, chu tun thleng pawhin a thupui ber a la ni reng tih BJP Mizoram president hian a sawi.
PM Modi sawrkarin a tinzawn lian ber chu mirethei, loneitute, thalaite, hmeichhiate leh hriselna tih hmasawn a ni a. Union Budget-ah pawh chu chu a tinzawn a ni reng a. A taka chhawr theia inher rem turin Pu Lalduhawma kaihhruai sawrkar an ngen tih sawiin, “Union budget hi state specific budget niloin India ram pumpui ministry wise/ sector-wise in budget allocation siam a ni a. Kan state-in eng sector ah nge sum kan mamawh tih chhinchhiah a, project tha tak siam a, state hmasawn nan sum dil mai tur a ni,” Vanlalhmuaka hian a ti.
Khuarel chhiatna hrang hrang atan, grant -in- aid atante state hrang hrangin kan mamawhna azira hman theih tur cheng vaibelchhe 8000 chuang a awm tih pawh sawiin, Modi kaihhruai sawrkar hian hmarchhak state mipui tan heti zozai sum a dahsak chu BJP Mizoram chuan lawmawm an tih thu a sawi.
“Mizoram leh mipui dinhmun hmasawnna kawnga chawikang dawrh thei tur, a bikin agriculture, tourism leh economic sector hrang hrang – investment in infrastructure and renewable energy, employment generation sector, social justice & tribal welfare lamah policy leh hmathar lakna tur a awm teuh a. Mizoram sawrkar hian Modi kaihhruai sawrkar hi a thawhpui thiam a, a chhawr thiam phawt chuan buhzem bulah tam chhawlin kan let reng loang,” a ti.
Central scheme hrang hrang kaltlangin Mizorama kutthemthiamte, puantahtute, khawpui kawngkama dawr siamtu (street vendors) tan sum tam tham tak dah a ni tih State BJP hruaitu hian a sawi a. Thalai hna nei lo, mahni kea ding duh, loan mamawhte tanpuina loan (MUDRA loan) nuai 10 thleng ni thin chu nuai 20 thleng tihpun a nih thu pawh a sawi.
“Kan state sawrkar hian uluk taka central budget hi a zirchian a, Mizoram hmasawnna atana a hman duh phawt chuan, a hranpaa hand holding policy emaw SEDP emaw ngai loin, Mizoram tan hmansawnna a thlen thei vek a. A haichhuahna kawnga harsatna an tawh chuan tanpui turin BJP Mizoram kan inpeih reng a ni,” a ti.