Union minister hoin inhmukhawm

Union minister hoin inhmukhawm
Union Minister of Road Transport & Highways Nitin Gadkari kaihhruaiin Thawhtanni khan India rama state leh union territory (UT) hrang hranga Transport minister-te intawhkhawm New Delhi-ah neih a ni a, Mizoram Transport minister TJ Lalnuntluanga pawh telin state mamawh hrang hrang a thlen.
Mizoram minister chuan lirthei fit leh fit lo endikna tur Inspection & Certification Centre Hlimen Aizawla sak mek a nih thu leh changtlung zawka thuamthat a ngaih thu a sawi a. Union minister hian an lo enzui tur thu a hrilh nghal. Hei bakah hian Vehicle Scrapping Policy chungchang sawiin, Mizoram ang sum leh pai dinhmun la hniam taka lirthei neituten a thar lei lehna tura harsatna an tawh theih dawn avangin, vehicle scrapping ti turte tan incentive /relief measure siam turin a ngen a; Union minister chuan ngaihtuahzui an tum tur thuin a chhang a ni.
National Electric Bus Programme (NEBP) hnuaia electric bus kalpui dan tur programme sawrkar laipuiin a duang chu state-in tha a tih thu TJ Lalnuntluanga hian a sawi a. Mizoram ang tlangramah hmantlak a nih dawn leh dawn loh a zawhna chu Union minister hian, a hmantlak tur thu leh a siamtu company-te nen pawh hemi chungchangah hian an thutkhawm leh thuai tur thu a sawi a ni.
Thutkhawm zawh hian Transport minister chuan Nitin Gadkari hi hmu nghalin, Khankawn leh Kanan Veng Champhai inkar kawng km 3.7 a thui, tuna NH-6 kawng siam mekin a huam chu double lane-a siamsak turin a ngen a. Myanmar nena insumdawntawnna hmun pawimawh, Zokhawthar Tiau luia Mizoram leh Myanmar inkalpawhna lei siamna tur, cheng vaibelchhe 22.50 hu project proposal siam chu tihhlawhtlinsak ngei tura ngenin, Zokhawthar thleng National Highway-a puanna gazette copy a pe tel. Union minister chuan a hlawhtlin theihna’n hma a lo lak tur thu a hrilh a ni.