Union minister-in Champhai tlawh

Union minister of state for Housing & Urban Affairs Tokhan Sahu chuan Ningani khan Champhai a tlawh a, DC office buatsaihin an district-a sawrkar hotute leh khawtlang hruaitute nen an inkawm.
Union MoS chuan, inpumkhatna a pawimawh, tiin, India ramah hian hman atang tawhin inpumkhatna pawimawh zia kan sawi tawh a, kan hnam leh nihna hlutna hrechiang chunga India ram midangte nena inpumkhatna vawngnung turin a chah.
Tun sawrkarin hmarchhak a ngaipawimawh em em a, hmalakna hrang hrang a awm a, hna pawh thahnem tak thawh a ni tawh tih a sawi a. One India siam an tum ber a ni, tiin, Prime minister thiltum a hlawhtlin theihnan sawrkar hnathawkte tha taka thawk turin a sawm tih a sawi. Mipui pawhin One India – India inpumkhatna siam theihna atan tan la zel turin a chah bawk.
Hemi hnu hian Tokhan Sahu hian Pradhan Mantri Awas Yojana – Urban (PMAY-U) leh Deendayal Antyodaya Yojana – National Urban Livelihood Mission (DAY-NULM) hnuaia hamthatna dawngtu a kawm a ni.
Sawrkar scheme hrang hrang, mipuiin an la hriat hnem tawk loh, tangkai pui theih deuh tur si a awm teuh a, chu’ng chu hriat tuma hmang tangkai turin mipui a sawm tih a sawi a. Heng scheme hi mi tam thei ang berin an hlawkpui theihnan sawrkar hnathawkte tang turin a fuih.
Union MoS hian AMRUT 2.0 hnuaia sak mek Mualkawi Solid Waste Management Centre a tlawh bawk a. A sak dan leh hnathawh dan a endik. He hmun hi bawlhhlawh paihna atan hman tan tum mek a ni.