Union MoS-in MADC leh CADC tlawh

Union MoS-in MADC leh CADC tlawh
Union minister of state for Home Affairs Nityanand Rai chuan Nilaini khan Mara Autonomous District Council leh Chakma Autonomous District Council a tlawh a. State leh District Council sawrkar hotute bakah NGO-te a kawm.
Nilaini zing khan Siaha a thleng a. Siaha district MLA pahnih, MADC hotute, Mizoram sawrkar official-te bakah NGO hruaitute nen an inkawm. MADC CEM M Laikaw chuan MADC-in rei tak a lo buaipui tawh, District Council-in thuneihna sang zawk an neih theihnana 6th Schedule of the Indian Constitution Amendment sawiin tih hlawhtlin pui ngei turin a ngen.
Union MoS chuan mipui aiawha a kawmten harsatna an thlen chu sutkian a nih theihnan theihtawp chhuahpui a tum tih a sawi a. Prime minister Narendra Modi-a’n hmarchhak state-te a ngaipawimawh a, India ram hmasawnna atan hmarchhak state-ten hma an sawn phawt a ngai tih chu a ngaihdan a ni, tiin, sawrkarna fawng an vawn tirh atangin hmasawnna tam tak hmuh tur a awm tawh tih a sawi a ni.
Chawngte-ah CADC hotute nen an inkawm a. CADC dinhmun tlangpui, hmasawnna hnathawh leh harsatna an neih bakah hmasawnna awm tura pawimawh an lo thlen.
Union MoS chuan harsatna an thlen chu sutkian a nih theihnan theihtawp chhuahpui a tum tih a sawi a. A bikin ziaka a dawn chu sawrkar laipui hnenah a thlen tur thu a sawi a. India ram chu ‘developed nation’ a siam turin sawkar laipuiin theihtawp a chhuah tih sawiin, One Nation One Ration Card, NEP 2020, inkalpawhna leh hriselna lamah ‘flagship scheme’ duan leh kalpui mek a ni tih a sawi.
ADC pathum tan sawrkar laipuiin theihtawp a chhuah zel dawn tih Nityanand Rai hian a sawi a. Myanmar leh Bangladesh nen ramri nei vek an nih bawk avangin ramri venhim kawngah theihtawpa thawkho turin a chah.