United an chak awlsam

September 26, Thawhleh zan khan English Carabao Cup third round khelh a ni a. Manchester United chuan Old Trafford-a an mikhual Crystal Palace chu si thum faiin an sawp a fourth round an lut. Inkhel dangah Burnley chuan si li faiin Salford City an sawp ve bawk.
Season thara bul tan tha lo, insiamtha chho mek United hian Old Trafford-ah an mikhual Crystal Palce lakah an khel tha viau a, darkar khat tlin hmain goal thum an thun hman der. Si thum fai ngawta Crystal Palace an sawp hi season thara an khelh that ber tum ang hial a ngaih a ni a. Manager Erik ten Hag duh ang ngeiin a player ten an khel chhuak ta niin sawizui a ni hial bawk.
An muala bul tan tha United tan hian minute 21-naah Argentina rawlthar Alejandro Garnacho chuan defender Diogo Dalot siamsak tha tak chu lei hrulah a pet goal a, hmahruaina goal a thun. Argentina rawlthar Garnacho hian player ropui Cristiano Ronaldo goal lawm danin a lawm zui a, hei hian lawm a hlawh rualin sawi zui a hlawh a. Argentina player ten helhin, Argentina team-ah a tlak tlum loh phah ring tawk an awm.
Garnacho goal thun hnu hian Red Devils in goal an thun zui leh thuai. Fuh taka an khingpuite an nawr tlang hnuin penalty hlawhchhuak ngei turah an inngai hman a, mah se an beisei hlawhchham. Penalty beisei hlawhchham mah se corner atangin goal an thun zui leh ta tho thung. Minute 27-naah Mason Mount corner pet tha tak chu Casemiro chuan fuh zetin a tauh goal a, an hmahruaina a tizau. Goal hnih an thun hnu hian chawlhlawk hmain goal dang an thun belh thei lova, si hnih faia hmahruai chungin chawlhlawk an hmang.
Chawlhlawk hnu lamah United an khel tha chhunzawm a, goal an thun leh thuai. Minute 55-naah lekah Casemiro siamsak chu Anthony Martial chuan far post-ah kawh zetin a pet goal a, an goal thumna a thun. Si thum faia hmahruai United hian an khel tha chhunzawm viau a, an mikhualte tihthaih nawn bawk mah se goal dang an thun belh thei lova, an mualah si thum faia hnehna changin last 16 an inhlangkai zui ta a ni.
Thawhlehnia inkhel dangah EPL-a 19-na ni mek Burnley chuan League Two team Salford City an hmachhawn a, si li faia hnehna changin, last 16 an inhlangkai.
Peninsula Stadium-a lenglut Burnley tan hian minute 12-na lekah Sander Berge chuan Zaroury siamsak atangin hmahruaina goal a thun a. Minute 20-naah Zaroury hian goal thawkchhuak nawn lehin, a siamsak tha tak chu Jacob Bruun Larsen chuan a thun zui leh. Goal hnih an thun hnuin an khel tha chhunzawm viau a, minute 27-naah Dara O’Shea chuan an goal thumnaa thun a, si thum faia hmahruai chungin chawlhlawk an hmang.
Chawlhlawh hnu lamah Burnley an khel tha chhunzawm viau naa, goal an thun har ta viau thung. Minute 81-naah Wilson Odobert chuan Zaroury siamsak atangin an goal lina a thun. He inkhelah hian Zaroury hian goal thun lo mah se a khel tha viau a, assist vawi thum neiin, hattrick a siam ve thung.
Premier League club pahnih; Manchester United leh Burnley ten hnehna an chan laiin Wolves erawh Ipswich Town hneh lovin an tla ve thung.
EPL-ah 16-na ni mek Wolves hi Championship club Ipswich Town hmachhawn turin Portman Road-ah an lenglut a. Mikhual an nihna hmunah si hnihin hmahruai hma viau mah se mual neitu er let an tuar lova, goal thum chhuahin an mualpho.
Wolves hian an len luhna mualah goal an thun thuai a, minute lina lekah Hwang Hee-Chan chuan hmahruaina goal a thun a, minute 15-naah Tote Gomes chuan an goal hnihna a thun belh zui ve leh nghal zat. Hma takah goal hnih an thun zawn vangin Wolves hian hnehna an chan ngei a rinawm hman a, an pawr zuih ta tlat thung.
EPL club lakah goal hnih chhuah hma viau mah se Ipswich Town an insiamtha thuai a, tha takin an mikhualte an hmachhawn let. Minute 28-naah Omari Hutchinson chuan an goal khat thunin an si phurh a sut then a. Minute 39-naah Freddie Ladapo chuan an goal hnihna a thun a, an si phurh a sut zo. Goal hnih ve ve an thun hnuin mualneitu Ipswich Town an khel tha ta viau a, minute 58-naah Jack Taylor chuan hma an hruai letna goal a thun a, EPL club Wolves lehthalin, last 16 an inhlangkai zui ta a ni.