United an chak zo lo

September 25, nilai zan khan UEFA Europa League 2024-25 khelh tan a ni a. Europa league zan khatnaah Manchester United an chak zo lo. United hi an mikhual Twente nen 1-1 in an inhnehtawk.
EPL a bul tan tha lo Manchester United hian Old Trafford ah Twente an mikhual a, an mualah an khel chhe hran lo. Minute 35 naah Christian Eriksen chuan hmahruaina goal a thun. Old Trafford chhuahsan hnai tur anga ngaih Eriksen hian Sam Lammers tihfuh tawk loh a hrem a, an hmahruaina goal a thun.
An mualah goal an thun hmasak vangin team lian zawk United in chak theihna hun tha tak an nei a. Point thum hmu turin rin an kai hle nghe nghe. Hun engemaw chen hma hruai bawk mah se United hi an him tluan thei bik lo. Sam Lammers chuan minute 68 naah goal thunin an si phurh a sut.
Goal an chhuah hnuin United an tang thar viau mah se hun tawp thlengin an hlawhtling thei tawh lova, an mualah ngei uiawm takin an chak zo ta lo a ni.
Manchester United hian season tharah bul an tan tha lo a, EPL ah 11 na an ni mek. Europa league lamah pawh team lian, champion tura rinkai an ni a. Rinkai ni mah se bul an tan tha lo va, Twente nen an inhnehtawk ringawt. An khelh chhiat tluan vangin United manager Erik ten Hag dinhmun a him lo leh zuala ngaih a ni.
Nilai zana inkhel dangah Italian club Lazio chuan an len chhuahna mualah awlsam takin an hnehna an chang a. Mualneitu Dynamo Kviv chu 3-0 in an sawp.