United an chak zo lo

Thawhtan zan khan English Premier League 2025-26 khelh chhunzawm niin inkhel pakhat a awm a; goal 8 zet luhna inkhelah Manchester United leh an mikhual AFC Bournemouth te 4-4 in an inhnehtawk. An hmahruaina tum thum ngawt an venhim zawh loh vangin United in an tum angin table-ah hma an sawn chak hlei thei lo.
Manchester United hian Old Trafford-a an mikhual AFC Bournemouth lakah an khel tha viau a, goal pawh an thun har lo. United hian ngam takin an khingpuite an nawr a, inkhel tan atanga minute 13-na lekah Amad chuan awlsam takin a tauh goal a, hmahruaina goal a thun. Bournemouth hi Old Trafford-a an len luh hnuhnung pahnihah 3-0 ve ve in an tlawm a, thawhtan zanah goal an chhuah hma leh tak viau vangin an tlawm nawn leh mai a rinawm hman viau.
Amad goal thun hnuin goal lut a awm belh thei lawk lova, chawlhlawk dawn hnaih minute 40-naah Antoine Semenyo chuan far post ah mawi leh tha zeta thawlh lutin goal a thun a, Bournemouth si phurh a sut. Goal an chhuah hnuin United an insiamtha thuai a, goal hmangin an mikhualte an chhanglet leh thuai. Minute 45+4 ah midfielder Casemiro chuan vanneihthlak ang reng takin hma an hruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lakah Bournemouth in bul an tan tha ve thung. Second half tan atanga minute khatna lekah Evanilson chuan goal thunin an si phurh a sut. An si phurh an sut zawh vangin Bournemouth an phur viau a, ngam takin United an nawr zui nghal. An si phurh an sut atanga minute ruk hnu lekah Marcus Tavernier chuan fuh zetin free kick a chhuih goal a, hma an hruai letna goal a thun. Team lian United khelmual Old Trafford-ah ngei hmahruaitu zawk an nih vangin Bournemouth an phur tak zet a, point thum hmuh ngei tumin thapui an thawh zui nasa hle.
Si phur zawk an nih vangin United an hnual lova, an buai hek lo. Goal thun ngei tumin tan an khawh thar leh a, na taka an khiingpuite nawr zui nghal zatin hlawh pawh an hlawhtling thuai. Captain Bruno Fernandes chuan fuh zetin free kick a chhuih goal ve leh. Top corner-a Fernandes chhuih goal hmang hian United in minute 77-naah an si phurh a sut. An si phurh an sut vangin United tantu ngui tawhte an phur thar leh a, an mualah chak ngei tuma thapui thawh thar lehin an muala mipui au thawm ring tak nen thahrui an nei thar leh a, an khelmualah ngei Sakawr pa tha ang maiin an tlan leu leh fua fua tawh.
An phur bawka United hian an phu ang ngeiin goal pawh an thawkchhuak leh thuai. An si phurh an sut atanga minute hnih hnu lekah an khingpuite nawr tlangin, hun tha an nei zui leh ngal zaat. Bournmouth tlarhnung tihsual vangin Matheus Cunha chuan goal thun theihna hun tha zet mai a nei a. Cunha hian hnaite atanga pet goal in, minute 79-naah hma an hruai letna goal a thun. United hian an mikhual AFC Bournemouth lakah a vawi thum nan hma an hruai let ta a, an mualah an chak ngei a rinawm viau tawh.
United hi an mualah chak ngei turin inngai tawh bawk mah se an mikhual Bournemoiuth te an la beidawng duh bik lo. Old Trafford ah tlawm pumpelh tumin tan an khawh zui chiam a, an thawhrim rah sengin an hlawhtling zui ta nghe nghe. Bournemouth tan hian Junior Kroup chuan minute 84-naah goal thunin an si phurh a sut. Kroup goal thun hnu hian hun tawp thlengin goal a luh belh thei tawh lova, goal riat zet luhna inkhel hmuhnawm takah United leh an mikhual AFC Bournemouth te chu 4-4 in an inhnehawk zui ta a ni.
Paruknaa awm mek Manchester United hian khingpui hautak an nei zui leh dawn a, pathumnaa awm mek Aston Villa nen Pathianni zanah an inhmachhawn ang a, Bournemouth hi inrinni zanah Burnley nen an inhmachhawn ve thung ang.