United an mualpho leh ta!

United an mualpho leh ta!
English football inkhai- diat danah Premier League a sang ber a, a hniam lama a palina (4th-tier) club Grimsby Town an tih chuan Nilaini zan khan an club chanchina hun ropui an tawng a, League Cup match pakhatah Manchester United an hneh a, EFL Cup atanga United tla ta hi cup football bika inbarakhaihna lian ber (biggest cup upset)-te zinga pakhat a ni chho nghal.
Grimsby khaw khelmual Blundell Park inkhelah hian hun pangngaiah team pahnih hi 2-2-in an inhnehtawk a, penalty shootout-ah 12-11-in League Two club Grimsby an vannei ta zawk a, an kawtkaia Premier League giants an tlawm hi an hre rei ve ngawt tawhin a rinawm!
Charles Vernam leh Manchester United youth player hlui Tyrell Warren-te goal hmangin mualneitu Grimsby lamin tan atanga darkar chanve chhungin an mikhual palian lakah sihnih faiin hma an hruai hman a, half time thlengin Red Devils-in an siphurh pakhat zawk tal pawh an sut zo lo!
United beilet tan Bryan Mbeumo chuan second half minute 75-ah an siphurh pakhat zawk a sut thei hram a, hei hi a club thar tana a goal hmasaber a ni zui ta nghe nghe.
He tournament-a vawi ruk champion tawh United hian an siphurh pakhat zawk an sut zawh theih mai loh avangin second round-ah an tawp mai dawn niin a lang hman a, Grimsby tlarhnung pawhin fak a hlawh tluanchhuak dawn niin a lang thuak tawh a, mahse, minute 89-a Harry Maguire chuan mikhual siphurh sut zawhna goal tauhluhin, team pahnih hi penalty hmanga thelh an ngai zui ta a ni.
Minute 18 chhung zet awh penalty petah Matheus Cunha khan thun se United an chak thei tawh mai tur a nih laiin dansak a ni a; a hnua penalty pet vawi 15 a lut vek a, chutah Cameroonian Mbeumo chuan goal kham petperin, a lehpek chu home fans sapatal a ni!
Humber lui kama chhiatna an tawh hnuah season liamtaa Erik ten Hag thlaktu United manager Ruben Amorim-a dinhmun a ngaihtuahawm chho hle dawn niin a lang!
Inkhelh banah Portuguese coach chuan team tha zawkin hnehna an changa a ngaih thu sawi tha ve mai!
Nilaini zan EFL Cup second round inkhel dangah Premier League club inlan ve dangte chuan Manchester United angin harsatna an tawk ve lo a, Brighton and Hove Albion chuan 6-0 tehrenga mualneitu Oxford United sawpin, Everton chuan Mansfield Town lakah 2-0 hnehna an chang a; Fulham pawhin sihnih fai bawkin second-tier Bristol City an hnawtchhuak.
Everton 2-0 Mansfield
Nilaini League Cup 2nd round inkhel dangah Carlos Alcaraz leh substitute Beto goal hmangin Hill Dickinson Stadium-a mipui 48,583 pungkhawm hmaah Toffees chuan sihnih faiin League One Mansfield Town an hneh a, third round an lut a, mualneitu Wolves an hmachhawn zui leh dawn a ni.
Second half tir lam leh hun tawp dawna David Moyes-a team goal hnih hi midfielder Harrison David Armstrong-a siamchhuah ve ve a ni.
Premier League club goal hmasa zawk thuntu Carlos Alcaraz kha US Open lama champion tura rinkai mek hi a ni lo a, Argentine attacking midfielder niin a hmingpum chu Carlos Jonas ‘Charly’ Alcaraz Duran a ni a; season liamta khan loan-in Liverpool khaw club tan hian a lo khel tawh a, kumin nipui thawt laiin Everton-in a nghetin an lei zui ta a ni.