United in Arsenal an hneh

Premier League club lian Manchester United leh Arsenal chuan inrinni zan khan MetLife Stadium, New Jersey-ah friendly match an khel a. Inkhel entu mipui 82,262 pungkhawm hmaah United chuan si hnih faiin Arsenal an hneh. Season thar atana inbuatsaihna inkhel dangah Chelsea chuan 4-3 in Brighton & Hove Albion an hneh ve bawk.
MetLife Stadium-a United leh Arsenal te inkhel hian ngaihven a hlawh a, entu mipui pawh an pungkhawm tam hle. Inkhel hmuhnawm takah United an chungnung zawk a, si hnih faiin hnehna an chang. Goal hnih an chhuah danah Arsenal tlarhnung an che fuh tawk lova, an player thar Kai Havertz chuan goal thun theihna hun remchang a chhawr tangkai zo lo bawk.
EPL club lian pahnihte hian hmuhnawm takin bul an tan a, an khel tha duh a, inkhel hmuhnawm an lantir. Mual laiah an indan nasat vangin goal hlauhawm an nei tam thei lo ve ve. Darkar chanve an khel tling chiah tihah Red Devils in hmahruaina goal an thun a. Manager Erik ten Hag-a’n captain thara a ruat Bruno Fernandes chuan captain thar a nih lawm nan a pet goal a, hmahruaina goal a thun. United captain thar Fernandes pet hi tha thawkhat bawk mah se Arsenal si nghak Aaron Ramsdale tan dan theih tura ngaih a ni a. A dan hman loh vangin a che fuh tawk lova ngaih a ni.
Goal an chhuah hnuin Arsenal in an si phurh sut tumin tan an khawh a, an khingpuite an nawr bet. Bet zawka an tan laiin United hian an nawr let thut. Gunners defender Gabriel ball pet sual chu Jadon Sancho chuan chak zetin a um a, box chhungah a khalh luh hnuin top corner-ah pui zetin a pet goal a, an goal hnihna a thun. Season liam taah beisei anga hmun chang tam thei lo Sancho hma lam hun a chiang lo mek. United hian Atalanta atanga Rasmus Hojlund an la thei a nih chuan Sancho tan chhuah a finthlak ang a. Denmark midfielder an la thei lo a nih chuan Sancho hi an player pawimawh a ni leh thei dawn thung.
Arsenal hian an si phurh sut tumin tan khawh thin mah se hun tawp thlengin goal an thun thei lo. Rawlthar forward Eddie Nketiah che chhe lo viau mah se goal a thun thei lo va, Chelsea atanga an lak Kai Havertz pawhin tauh luh theihna hun remchang a neih chu uiawm takin a hloh ve bawk. Hun tawp thlenga goal an thun theih loh vangin Arsenal si season thar atana an inbuatsaihnaah a vawi khat nan an tlawm. Gunners hian nilai zanah Barcelona an hmachhawn zui leh ang. Barca hi Juventus nen an inhmachhawn tur an ni a, an player te an dam loh sup sup vangin Italian club lian nen an inkhel tur hi thulh a ni a. Arsenal nen hian an inkhel thei dawn em tih a la chiang lo.
Arsenal laka chak United hian inbuatsaihna hun tha takin an hmang a, tlawm an la nei lo. Vawi thum an khelh tawhah an chak vek a, goal chhuah an la nei lo nghe nghe. Arsenal laka an chak vangin lawm viau mah se an forward Amad Diallo a inhliam chu United tan chanchin tha lo a ni ve thung.
Chelsea an chak
New Jersey-ah United leh Arsenal an inkhelh lai hian Pensylvania-ah Chelsea leh Brighton te an inkhel ve thung a, inkhel hmuhnawm takah Chelsea chuan 4 – 3 in hnehna an chang. Brighton an hneh tum hian Blued forward thar Nkunku chuan goal khat a thun.
Lincoln Financial Field-a inkhel ah hian Brighton in bul an tan tha zawk a, minute 13-na lekah Danny Welback chuan hmahruaina goal a thun. Goal chhuah hmasa zawkah tang mah se Chelsea an insiamtha thuai a, an si phurh an sut thuai. RB Leipzig atanga an lak luh Christopher Nkunku chuan minute 19-naah goal thunin an si phurh a sut. Nkunku hi a club thar Chelsea tan a chetha chho rih viau a, EPL-ah hmuhnawm zawkin a inlan chhunzawm a beisei awm.
Minute 19 chhungin goal khat ve ve thun nghal mai mah se goal dang thun belh turin an nghak rei ta viau thung. Minute 60-naah Brighton player Jan Paul van Hecke hnawhchhuah a ni a, hei hian Chelsea chet a tihawlsam phah. Tam zawk an nih hnuin an khingpuite an nawr zui viau a, goal pawh an thun nghal thuai. Minute 65-naah Mykhailo Mudryk chuan goal a thun a. Hei hi Chelsea tan a goal thun hmasak ber a ni nghe nghe.
Hma an hruai let hnuin Chelsea in inhnaihchilh takin goal an thun belh zui leh. Minute 72-naah Conor Gallagher chuan an goal thumna a thun a. Minute 76-naah Nicolas Jackson-a’n an goal lina a thun belh zui leh zat bawk.
Tlem zawk an nih bakah si thum ngawtin hnufual tawh mah se Brighton an hnual mai lova, huai takin an khingpuite an nawr let. Minute 79-naah João Pedro chuan penalty pet goal in an si phurh a sut then a. Minute 89-naah Deniz Undav-an an goal thumna thun zui leh bawk mah se an tlawm zui ta tho a ni.