United in Brentford an lehthal

Inrinni zan khan English Premier League 2023-24 khelh chhunzawm a ni a, Manchester United chuan McTominay goal hnih thun hmangin Brentford an lehthal. Inkhel dangah London club lian pahnih Tottenham leh Chelsea in hnehna an chang bawk.
United chhantu McTominay
Old Trafford-ah ngei khelh thum chhung tlawm zawn tawh Manchester United chu Old Trafford-ah bawk an tlawm leh teuh hle a. Hun pek belh minute 90+2 thlengin si phurh zawkah an tang. ‘A hman hmanin min hneh ta mai zawng a nih hi’ tiin United tantu tam tak chuan Old Trafford an chhuahsan tau nghawng nghawng hman hial tawh. An mualah an tlawm leh ngei dawn a lan laiin Scot McTominay a rawn lang a, minute li chhung leka goal hnih a thun hmangin United tlawm tur a chhan a, hnehna hlu bik a chanpui.
United hian an mikhual Brentford lakah bul an tan tha a, game an thunun nghal. Ball chang tak zawk ni mah se hlauhawm an siam tam thei bik lova, Mason Mount-a’n an hun tha neih a chhawr tangkai thei lo. Bet zawk an nih deuh reng hnuin Brentford an vannei a, goal thun hmasa zawkah an tang. Fuh taka an khingpuite an nawr tlang hnuin Brentford in ball an in pe dik lo. Ball in pe dik lo mah se United defender in an petchhuah that theih loh vangin hun tha an hmu zui leh a, minute 26-naah Mathias Jensen chuan lei hrulah a pet goal a, hmahruaina goal a thun. Jensen pet hi tha thawkhat mah se United tana goal veng pha chin tana chhuah chi niin a lang lo a, an si nghak thar Onana a che chhe tluang zel.
Minute 26-naa goal an chhuah sut tumin United in tan an khawh nasa hle a, minute 90+2 thlengin an hlawhtling zo lo. An mualah an tlawm ngei tura ngaih a nih hman laiin bench atanga lut Scott McTominay chuan minute 90+3-ah goal thunin an si phurh a sut. An si phurh an sut hnuin United an phur thar a, hun tawp dawn hnaiha team hlauhawm an nih thinna an lantir nawn leh. Hun tawp hamrik a rik hma lawkin Red Devils hian free kick an hmu hlauh. Free kick atanga ball kal hi defender Harry Maguire-a’n a tauh pial phawt a. Maguire tauh pial hi McTominay chuan hnaite atangin a tauh goal a, hma an hruai letna goal a thun.
United goal hnihna a luh hnu lawkah inkhel a tawp zui nghal a. Bul tan phak tawh lo Scott McTominay chuan a team chhanin, a chakpui a. Old Trafford-a tap hman mipui tam takin lawm vanga mittui tlain hun hlimawm an hmang. Old Trafford hmang thiam thin tak United hi tunhnaia an khelh hnuhnung pathumah an tlawm zawn a, hei hi kum 1979 hnu lama an mualah vawi thum an tlawm zawn lehna hmasa ber a ni a. Record chhe leh zual zawk an hnutchhiah dawn nia a lan hnuah hnehna an chang let leh hi United tan a ropui dangdai hle a. Manager Erik ten Hag tan a lawmawm leh zual hle ngei ang. McTominay goal hnih hian Brentford in kum 1937 hnu lama a vawi khat nan Old Trafford-a an chak theihna hun tha a tih-thlawnsak.
Pui taka Brentford lehthaltu United hian khelh riat atangin point 12 an hmu ta a, table laihawl luahin, 10-naah an in hlangkai.
Chelsea in hma lam an pan
Season thara bul tan chhe tak Chelsea an insiamtha a, hma lam panin an kal ve ta zel. Chelsea hian Turf Moor-a an khingpui Burnley lakah goal an chhuah hmasak zet hnuin 4-1 in hnehna an chang let a, point thum an hmu. Burnley an hneh tum hian England tana hmun chang phak ta lo Raheem Sterling an goal a thun.
Burnley hian an mikhual team lian Chelsea lakah bul an tan tha a, minute 15-na lekah Wilson Odobert chuan hmahruaina goal a thun. Goal chhuah hmasa zawk ni mah se Chelsea in goal thun an harsat zui a, an si phurh an sut lawk thei lo. Chawlhlawk dawn hnaih minute 42-naah Burnley player Ameen Al Dakhil chuan an lamah a ti-goal palh a, Chelsea si phurh sutsakin, 1-1 a inhnehtawk chungin chawlhlawk an hmang.
Chawlhlawk hmain goal thun thei lo mah se chawlhlawk hnu lamah Chelsea in goal thum ngawt an thun ta thung. Blues hian minute 50-naah penalty an hmu a, penalty hi Cole Palmer-a’n a pet goal a, an si phurh a sut. An si phurh an sut hnuin Pochettino team in an khel tha chhunzawm a, minute 65-naah Raheem Sterling chuan an goal thumna a thun a. Minute 74-naah Nicolas Jackson chuan an goal lina a thun zui leh a, 4-1 in an chak zui ta a ni.
Chelsea goal thumna thuntu Raheem Sterling hian England manager Gareth Southgate duhsak a hlawh viau thin a, ram tan khawih chet thiang lo tluk a ni reng thin. Tunhnaiah erawh Southgate hian Sterling hi a hnawl ta tlat thung a, England aiawh turin tum li ngawt a ko tel lo zawn tawh. Chelsea tan khel tha a, goal a thun chho leh ta hian England tan hmun a chan let leh beiseisa sang tak Sterling tak a siam ngei a rinawm.
A chung berah Tottenham
Inrinni zana inkhel dangah Tottenham Hotspurs chuan Kenilworth Road-a an khingpui Luton Town chu si khat faiin an hneh a, Manchester City lehpelin table chung ber an luah.
Kenilworth Road-a lenglut Tottenham hian goal an thun thei lawk lova, chawlhlawk dawn hnaih minute 45+4-ah Yves Bissouma hnawhchhuah a ni. Tlem zawk ni chunga second half an hmachhawn vangin an chak zawh loh mai a rinawm hman viau. Tlem zawk ni mah se second half-ah goal an thun ta thuai thung. Minute 52-naah Micky van de Ven chuan hmahruaina goal a thun a, he goal hi an chakpui zui ta a ni.
Tlem zawk ni chunga Luton Town hnehtu Tottenham hi season kal mekah an khel tha viau a, vawi riat khel tawhin tlawm an la nei lo. Khelh riat atanga point 20 hmuin table chung berah an inhlangkai a. Pathianni zanah Manchester City in Arsenal an hneh a nih chuan Spurs hi pahnihnaah an tlahniam leh thung ang