United-in Sesko chang ta nge nge

United-in Sesko chang ta nge nge
Manchester United chuan RB Leipzig atangin striker Benjamin Sesko chu pound maktaduai 73.7 tling chho thei turin an lei fel thei ta.
Slovenia international hi kum nga daih contract an ziahpui nghal a; a manah hian pound maktaduai 66.3 an pe phawt a, a bak la awm chu a khelh tam leh kehlh that azirin an chhunglut leh dawn a ni.
Kum 22 mi hi tun nipui insuan hun laia United-in an tlarhma tichak tura player an sengluh pathumna niin, Sesko hma hian Matheus Cunha (£62.5m) Bryan Mbeumo (£65m with £6m in add-ons) an lo lei fel tawh a, tuna an mithar nen hian Inrinni khan pre-season home game-a Fiorentina an hmachhawn tumin an club fans hmaah an pholang tawh nghe nghe a ni.
Sesko hi Newcastle United pawhin beisei ve tho mah se player ber hian Ruben Amorim-a team tana khelh a thlang ta zawk a ni.
Season liamta khan Old Trafford club hi an chechhe hle a, Premier League-ah 15-na ni pha chauhin, Magpies erawh pangana niin, EFL Cup an lak bawk avangin season tharah Champions League an khel pha dawn a, hei hi an dinhmun ni mah se Sesko hian Manchester khaw club tana khelh a thlang zawk tlat a ni!
Europe-a inlan theihna hun remchang hnawla United a thlan chhan sawiin Sesko chuan, “Manchester United history hi a special bik ngawih ngawih a, mahse, chu aia min la tiphur leh zawktu a la awm cheu a, chu chu he club hmalam hun hi a ni.
“Club hmachhawp kan sawiho a, hmalam pana thang zel tur leh trophy lian ber ber chuh leh ngam turin he team hi a insiamrem tawh a, engkim hi a awmna hmun tur vekah awmin, ka lo thlen phat atangin club chhunga chakna thahrui leh chhungkaw boruak chu ka tem thei nghal a ni.
He hmunah ngei hian keimaha level sang leh leh ka lo tum ve zawng zawngte chu a hlawhtling thei tih ka chiang a; Ruben lak atanga inzirbelh thuai thuai ka nghahhlelh rualin ka team-mate tharte nena hlawhtlinna sualchhuah ho za tawh ka nghakhlel a, chu chu kan tanhona hmangin kan ti thei tih kan zavaiin kan hria a ni,” a ti.
MUTV-ah thu sawiin, United head coach Amorim chuan a nau thar chungchang heti hian a sawichhuak a: “Kan mamawh ang tak nihphung kawltu a ni a; Ben hi min hrilh ang chiah mihring a ni a, kan p[awla awm tura kan duh chi niin, kan senglut thei hi kan hlim hle a ni,” a ti.
Season hnuhnung liamta pahnihah khan Sesko hi Germany lamah talin Leipzig thuam a inbel a; he team hi kum 2023 khan an sister club Salzburg atangin a zawm a; inelna hrang hrangah game 87 khelin goal 39 lai a thunsak tling a, assist vawi riat nei tel bawkin, a goal thun zinga 27 chu Bundesliga match 64 atanga a tihluh a ni nghe nghe.
Europe-a league lian zual pangate zingah Sesko hi under 23 player zinga top goalscorer a ni mek a, Real Madrid star Jude Bellingham ain goal khatin a sang a, kumin nipui lai veka Bayer Leverkusen atanga pound maktaduai 100 tehrenga Liverpool zawm ta Florian Wirtz aiin goal lai zetin a thun tam zawk bawk.
A la naupang hle chungin season liamta khan Sesko hi Bundesliga pumpuia striker tlanchak berte zinga mi niin, a top speed chu darkar khata km 35 (35.7km/h) a tling a, 6ft 5in tehrenga sang a nihna hian a tuan a timuang lo mai ni loin a bawp seina chu tlan chak kawngah puitu tha atan a hmang thei a; chu bawk chuan ball kangah pawh nasa taka puiin, midang nena ball kang an inchuhah striker dangte nen khaikhina a hlawhtlinna rate chu 57.4% a tling.
Season liamta hnuhnung pahnihah khan Sesko aia goal khung hneh forward paruk chauh awmin, long range atanga goal khung lamah pawh a hniam lutuk lo a, long shoot hmanga a chhuihah 36.8% hlawhtlinna changin, a goal thun zinga 23.1% lai kha box pawn atanga a tihluh a ni a, he tehna pahnihah hian season liamta bikah khan Bundesliga striker zingah a sang ber mai ni loin goal 12 chuangin a chungnung larh a ni!
Sesko a lo lan takah hian Old Trafford club-a Denmark striker Rasmus Hojlund-a dinhmun chu a him lo thei mai ang em tih zawhna a piang nghal a; Amorim-a team-ah hmun chan inchuhna sang chho zel mah se tunhnaiah Hojlund hian United-a cham zui zel a duh thu a lo sawichhuak tawh a ni.
He boruakah hian United chuan kum 22-a upa Hojlund hi pound maktaduai 30-in an zuar tih media report-ah a lang a, tun dinhmuna ngaihventu langsar ber chu AC Milan niin, Italian club hian loan-a chhawr an duh tih hriat a ni.
Hojlund hian Atalanta atanga pound maktaduai 72-a Manchester United a zawm hnu khan season liamta hnuhnung pahnihah belhkhawmin goal 14 chiah a thun tling a, an final pre-season friendly match penalty shoot out hmanga Fiorentina an hneh tumin substitute bench lamah a thu tluanchhuak nghe nghe.