‘United in Triumph’ event Antilia a neihah Esther Hnamte a perform

India pahausa ber Mukesh Ambani nupui Nita Ambani’n Cricket World Cup a champion Indian team te chawimawina hun a buatsaih United in Triumph event-ah Mizo hmeichhe naupang zaithiam, Esther Hnamte chu tha taka perform-in, nimin tlai khan Mumbai an rawn chhuahsan leh ta. He event-ah hian India milar tak tak an tel a, Bollywood star Amitabh Bachchan atanga Jhanvi Kapoor te pawh an inlan.
United in Triumph event hi Mumbai-a Ambani chhungkaw in, Antilia-ah neih a ni a, he event hi Nita Ambani’n a host a, World Cup champion team thum- mipa team, hmeichhe team leh hmeichhe mitdel team te chawimawina hun hi Thawhtanni khan neih a ni.
Esther Hnamte hi he event-ah hian zai tura sawm a ni a, Esther-i kalpuitute chuan he event-ah hian an lo dawngsawng tha hle niin an sawi a, Esther-i pawhin lawm a hlawh a, nuam an ti viau niin an sawi a, nimin tlai dar 3 khan Mumbai atangin an rawn thlawk haw leh ta a ni.
United in Triumph event hian ngaihven a hlawh hle a, India milar tak tak an tel a, Bollywood lam atangin Vidya Balan, Varun Dhawan, Reiteish Deshmukh leh Genelia te pawh inlan zingah a tel a, Indian cricketer chawl tawh Sachin Tendulkar pawh a nupui leh a fanu nen an tel a, Indian tennis star Sania Mirza, cricketer Rohit Sharma, Jasprit Bumrah, Hardik Pandya, Suryakumar Yadav pawh an kawppui te nen an inlan.