United leh Spurs an chak

May 1, Ningani zan khan UEFA Europa League semi-final thawhkhatna khelh a ni a. Mimualah si thum fai ngawta hnehna chang Manchester United in final an hnaih. United rual hian Tottenham pawhin hnehna an chang ve bawk a. Final-ah English club pahnih intum theihna kawng a inhawng zau hle. United leh Tottenham te hian final an lut ve ve a nih chuan season tharah English club parukin Champions league an khel thei dawn.
Bilbao 0-3 United
English Premier League-ah 14-naa awm mek Manchester United chu Athletic Bilbao hmachhawn turin Spain-ah an zin a, San Mamés mualah an lenglut. Mikhual an nihna hmunah bul tan tha bik lo mah se penalty an hlawhchhuah leh Bilbao lamin red card an hmuh an chhawr tangkai a, chawlhlawk hmain goal thum ngawt an thum. Chawlhlawk hmaa goal thum an thunte hi an chakpui a, an ke lehlamin final an rah theih phah.
Athletic Bilbao hian an mualah bul an tan tha a, Inaki Williams chuan inkhel tir lamah a tauh goal teuh hle. An him hram hnuin United in goal thun theihna hun tha nei bawk mah se an chhawr tangkai thei bik lo. Goal lut a awm theih lawk loh hnuin United in goal an thun ta nge nge. Harry Maguire siam tha tak atangin Case Miro chuan minute 30-naah hmahruaina goal a thun.
Mikhual an nihna mualah goal thun hmasas zawka an tan vangin United an phur viau a, inrintawkna sang zawk nen an khingpuite an nawr zui nghal. An mikhual ten an nawr nat em vangin Athletic Bilbao an buai a, apenalty an chawi zui leh thuai a, an player Dani Vivian chu minute 35-na lekah hnawhchhuah a ni bawk. Vivian hian box chhungah Rasmus Hojlund a tihtluk vangin penalty a chawi. Pennalty a chawi bakah Vivian hi hnawhchhuah a ni bawk. Penalty an hmuh hi captain Bruno Fernandes chuan minute 35-naah a pet goal a, an hmahruaina tizau turin an goal hnihna a thun.
Inhnaih chilh taka goal hnih an thun vangin United an phur leh zual a, chak ngei tumin tan an khawh chhunzawm. United an phur laklawh laiin Athletic an buai chhunzawm ve thung a, goal an chhuah belh leh. United goal hnihna thuntu Bruno Fernandes chuan minute 45-naah an goal thumna a thun zui leh a, 3-0 ngawta hmahruai chungin chawlhlawk a hmang.
Chawlhlawk hnu lamah inkhel a hmuhnawm chhunzawm viau a, goal erawh a luh belh thei tawh lo. Atletic Bilbao in an si phurh sut tumin tan khawh bawk mah se tlem zawk an nih an tuar a, phur taka inlan United tlarhnung an pal tlang thei tawh lo. United pawhin goal thun aiin an goal neih sa venhim an thupui zawk tawh bawk nen goal dang luh belh lovin inkhel a tawp. First leg-ah 3-0 ngawtin an chak a, Old Trafford a inkhel zui leh tur an nih bawk vangin United hian final an lut tluka ngaih a ni a. Inlehthalna thlentir turin Athletic Bilbao hian Old Trafford-ah thil mak danglam bik an thlentir a ngai tawh dawn.
Tottenham pawh an chak
Europa League semi-final lehlamah EPL-a 16-na luah mektu Tottenham Hotspurs chuan an mualah Bodo/Glimt an mikhual a, an mualah 3-1 a hnehna changin, final an hnaih ve sawt bawk.
EPL a talbuai Tottenham hian an mualah duhthusama thain bul an tan a, goal an thun hma hle. Inkhel tan atanga second 30-na lekah Brennan Johnson chuan hmahruaina goal a thun nghal. Hma takah goal an thun vangin an phur tak zet a, inrintawkna sang tak nen an mualah an inlan theih phah. Norway club Bodo/Climt hian an si phurh sut tum viau mah se an hlawhtling zo lova, chawlhlawk hmain goal an chhuah belh leh. Tottenham tan hian James Maddison chuan minute 34-naah an goal hnihna a thun a, 2-0 a hmahruai chungin chawlhlawk an hmang.
Chawlhlawk hnu lamah Tottenham an khel tha chhunzawm a, goal an thun belh leh thuai. Goal thun mamawh tak chungin Bodo/Glimt an chesual a, penalty an chawi. He penalty hi Dominic Solanke chuan minute 61-naah a pet goal a, an hmahruaina tizau lehzual turin an goal thumna a thun. Si thum ngawt an hnufual hnuin hun tawp dawn hnaihah mikhual team a chefuh a, goal khat an thun. Bodo tan hian Ulrik Saltnes chuan minute 83-naah goal thunin an si phurh a sut then a. He goal hmang hian second leg-ah hnehna an channa kawng a awlsam phah deuh an beisei a. Final lut thei turin Spurs hi an lehthal ngei a ngai dawn thung.
Manchester United leh Tottenham ten Europa League final an lut a nih chuan season tharah English club paruk ngawtin a vawi khat nan Champions League an khel dawn. Tun dinhmunah chuan team hnih ten final luh an hnaih hle.