United leh Spurs chak lo zo

Ningani zan khan UEFA Europa League quarter-final thawhkhatna khelh a ni a. Quarter-final thawhkhatnaah English team lian pahnih; Manchester United leh Tottenham Hotspurs ten hnehna an chang zo lo. English team lian pahnih an chak zawh loh lai hian Bodo/Glimt chuan an mikhual Lazio chu si hnih faiin an lo hneh ve thung.
England tualchhung inelna hrang hranga chetha lo Manchester United chu French club lian Lyon hmachhawn turin Groupama Stadium-ah an lenglut. An lenluhna mualah an khel tha lem lo a, goal chhuah hmasa zawkah ang bawk mah se tlawm an pumpelh hram thung. Mimualah tlawm an pumpelh vangin semi-final luh beiseina lian tak erawh Red Devils hian an nei zui tho thung.
French club lian Lyon hian an mikhual Manchester United lakah an khel tha viau a, goal thun hmasa zawkah an tang. United si nghak Andre Onana chetsual vangin Thiago Almada chuan minute 25-naah free-kick atangin hmahruaina goal a thun. Almada free-kick chhuih hi tuman an dek lova, awm hmun fuh tawk chiah lo Onana chuan a mualpho belhchhah turin a khawih thelh zui leh a, Lyon hian awihawm loh ang reng takin hmahruaina goal a thun. Lyon hian Onana chetsual an chhawr tangkai a, goal hmahruai thun turin an vanneihpui.
Hmahruaina goal an thun vangin Lyon an phur a, an mualah hnehna chan ngei tumin tan an khawh zui. United hian san si phurh sut tei lawk lo mah se chawlhawlh dawn tepah goal an thun ta nge nge. United defender Leny Yoro pet tha tia sawi hluai tur ni lem lo chu mak tak maiin a goal teh tlat. Brazilian si nghak Lucas Perri awmhmun fuh tawk loh vangin United hian minute 45&+5-ah goal an thun hlauh a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm leh zual a, goal hnih a luh belh leh. Hun rei tak chhung goal lut a awm belh thei loh hnuin Mancheser United tan hian Joshua Zirkzee chuan minute 88-naah hma an hruai letna goal a thun. United hian an hmahruaina venhim tum viau mah se an hlawhtling thei lova, hun tawp dawn tepah goal an chhuah leh ta zawk. Hun pangngai tawp hnu minute 90+5-ah Lyon tan Rayan Cherki chuan goal pawimawh tak thunin an si phurh a sut. Cherki goal thun hnu hian goal dang a lu beleh thei tawh lova, team hnihte hi 2-2 in an inhnehtawk zui ta a ni.
Manchester United hian Mimuala an hneh loh Lyon hi Old Trafford-ah an mikhual zui leh daw a, an mualah hnehna changin, semi-final luh ngei an tum dawn. Lyon hian Old Trafford-ah ngei hnehna changin semi-final luh ngei an tum dawn bawk a, inkhel hmuhnawm tak a nih ngei a beiseiawm. United tan Europa League hi season ka mekah trophy an lak theih awmchhun a ni a. Season tharah champions league khel pha turin Europa League-a champion an mamawh dan a sang leh zual. Trophy chawi lova season an khar a nih chuan manager Reuben Amorim hma lam hun tur a chian loh phah thei dawn.
Ningani zana inkhel dangah London club lian Tottenham chu an mualah an chak zo lova, an mikhual Eintracht Frankfurt nen 1-1 in an inhnehtawk.
English Premier League-a chetha lo Tottenham hian an mualah bul an tan tha lova, goal an chhuah hma hle. Inkhel tan atanga minute rukna lekah mikhual team Eintrach Frunkfurt tan Hugo Ekitike chuan hmahruaina goal a thun nghal. Hma taka goal an chhuah hi minute 26-naa Pedro Porro goal thun hmangin Spurs in an sut a. Hun tawp thlenga goal lut a awm belh theih tawh loh vangin 1-1 in an inhnehtawk zui ta a ni. An mualah an chak zawh loh vangin Tottenham tan semi-final luh a harsa leh zual dawn a. Germany-a an zin hunah hnehna chan tumin tan an khawh ang.
Inkhel dangah Rangers leh an mikhual Atletic Club te goal awm lovin an inhnehtawk a. Hetihlai hian Bodo/Glimt chuan Ulrik Saltnes goal hnih thun hmangin an mikhual Lazio an hneh a, pen khatin semi-final an hnaih lehzual sauh. Mimualah inkhel an hmachhawn zui leh a ngai ve dawn thung.