United leh Tottenham an tlang

January 30, Ningani zan khan UEFA Europa League, league round bik chu khelh zawh a ni ta a. English club lian Manchester United leh Tottenham Hotspurs te a sang zual pariat zingah telin last 16 an lut. United hi Season kal meka Champions League leh Europa League khelh zingah tlawm lo awmchhun an ni.
United tan Mainoo a vul
English Premier League lamah beisei anga result tha nei hlei thei lo, table laihawl hnuai lama awm deuh ngar ngar Manchester United hi Europa League lamah an khel chhe lem lo viau a. Chak pur pur bik lo mah se an tlawm duh miah lo thung. Red Devils hi ningani zan khan Romani club FCSB hmachhawn turin National Arena-ah an lenglut. Mikhual an nihna hmunah bul tan ‘ha bik lo mah se si hnih faiin hnehna an chang. United tan hian Kobbie Mainoo chuan goal a thun bakah assist a nei bawk a, a chetha hle.
EPL club lian United hian FCSB lakah goal an thun thei mai bik lo. Darkar khat an khel tling chiah tihah Diogo Dalot chuan Mainoo siamsak atangin hmahruaina goal a thun. Hmahruaina goal an thun hnuin an khel tha zui viau a, goal pawh an thun belh leh thuai. Hmahruaina goal an thun atanga minute riatna chiahah an goal hmahruai siamchhuaktu Kobbie Mainoo chuan an goal hnihna a thun a, an hmahruaina a tizau. Mainoo goal thun hnu hian goal dang a luh belh thei tawh lova, United chuan 2-0 a hnehna changin, point thum an hlawhchhuak ta a ni.
FCSB hnehtu United hian Europa League-ah khelh riat atangin point 18 an hmu a, pathumna ni chungin an tlang. Europa League-ah tlawm nei lo awmchhun ni bawk mah se draw vawi thum lai an nei a, an chunga awm pahnih Lazio leh Athletic club te chu point khat ve ve in an phak lo. Nilai zana an hneh tak FCSB hian khelh 8 atangin point 14 an hmu a, play-off khel turin an tling ve bawk.
Tottenham an chak
Manchester United in Mimualah hnehna an chan lai hian EPL-ah 15-na ni mek Tottenham Hotspurs chuan an mualah awlsam takin hnehna an chang a. An mikhual IF Elfsborg chu si thum faiin an lo sawp.
EPL-ah beisei phak lo taka inlan mek Tottenham hian an mikhual lakah si thum fai ngawtin hnehna chang bawk mah se goal erawh an thun har viau thung. Inkhel hmuhnawm takah Darkar khat chuang zet goal lut a awm theih loh hnuin hun tawp dawn hnaihah Spurs hian goal thum ngawt an thun ta tho thung. Chak mamawh Spurs tan hian Dane Scarlett chuan minute 70-naah hmahruaina goal a thun a. He goal hian mualneitu team a fuih phur hle.
Goal an thun hnuah phur leh inrintawkna sang zawk nena inlan Tottenham tan hian Damola Ajayi chuan minute 84-naah an goal hnihna thunin, an hmahruaina a tizau a. Hun pek belh minute 90+4-ah Mikey Moore chuan an goal thumna a thun zi leh cheu bawk. An mualah point thum an hmuh belh vangin Tottenham hian khelh 8 atangin point 17 an hmu a, palina ni chungin an tlang.
Champions League, Europa League leh Europa Conference League-ah English team an chetha tlang viau a, tla an la awm lo. UCL-ah team pathumin last 16 an lut a, UCL-ah Liverpool chu hmahruaitu an ni. Europa League-ah Manchester United leh Tottenham Hotspurs ten last 16 an lut chiang nghal a. Europa Conference League lamah pawh Chelsea chu hmahruaitu an ni mek bawk. EPL club zingah chetha tura ngaih Manchester City chuan play-off an khel phak ve hram thung.