United-Liverpool inkhel behbawmah mi pahnih an man

Hillsborough disaster an tih mai, Liverpool leh Nottingham Forest inkhelh laia Hillsborough Stadium chhunga fans inchilbuaina avanga mi 97 zetin nunna an chan phahna behchhana Liverpool diriamna thawm auchhuahpui avangin tunhnai khan police lamin Manchester United fan pahnih an man.
Pathianni FA Cup quarter-final match pakhata Old Trafford lut Liverpool lakah 4-3-in mualneitu Manchester United an chak a; inkhel boruak sang takah extra time hun pekbelha an goal thawhchhuah hmangin United an chak hram a; kha inkhelah khan Hillsborough disaster nena inzawm Liverpool diriamna thawm a richhuak a, chu chu dan phal loh a nih avangin police lamin stadium chhung video hlimthla atangin an chhui nghal a, mi pahnih man phawt an ni.
Nikum June thla khan Premier League team-te chuan inthurualin eng inkhelah mah kha chhiatna behchhana indiriamna auchhuahpui loh an remti a, ti lui an awm chuan criminal case awrhtir tur tiin thu an dah thlap a ni.
Pathianni fixture viltu police team hotupa chief inspector James Collins chuan kha inkhel ‘hot’ tak entu mipui tam zawkte chungah lawmthu sawiin, a tir atanga a tawp rat thlenga nungchang mawi lantirtute chungah lawmthu a sawi zet a, chutih laia kawhmawl bawl an awm thu leh chumi behbawma an mi mante chu kum 21 mi leh kum 59-a upa mipa ve ve an nih thu sawiin, kha chhiatna chungchang tarlang (tragedy chanting)-tute chunga dawhtheihna lantir theih a nih loh thu a sawilang tel.
Football Association thuchhuahin ‘tragedy chanting’ demna a tihchhuah hnuah Old Trafford-ah khan a tirah mi pariat man an ni phawt a, an zinga pakhat chu thubuai siamsak a ni a, a hnuah pakhat dang thubuai siamsakin, pahnih chuan thubuai an awrh zui ta tihna a ni.
Hillsborough disaster an tih kha han tarlang nawn leh lawk ila, kum 1989 April ni 15 daih tawh Hillsborough Stadium, Sheffield, South Yorkshire, England-a thil thleng niin, FA Cup semi-final pakhat zawka Liverpool leh Nottingham inkhelh tumin Liverpool supporter-te tana zuah Leppings Lane stand an tihah a leng tur zat aia tam inhnawhin fans an inchilbuai a, mi 80 dawn an thih bakah hliam ngawt pawh 766 an awm!