United si nghak beisei phak lozualte

English Premier League club ropui Manchester United hian goalkepper ropui tak tak an lo nei tawh thin a. Goalkeeper ropui tak tak karah beisei phak lo, an hnena khel chhia, beisei phak zui ta lo goalkeeper pasarih kan tarlang ang.
7. Mark Bosnich
Australian goalkeeper Mark Bosnich hi manager ropui Sir Alex Ferguson-a’n United-ah tum hnih a lak luh awmchhun a ni a. EPL tia hming thlak a nih hma khan division top goalkeeper zing a mi a ni. Aston Villa atangin kum 1999 khan United hi a zawm nawn leh kha a ni a. A tir lamah chetha thawkhat mah se a season hnihna atangin khelhna hmun a chang phak ta lo va, United-a a ropuina chu hma takah a chuai zui ta a ni.
6. Tim Howard
England lama tawnhriat la nei lo American goalkeeper hi kum 2003 khan United in an la lut. United tan hun a hman thla hnih khatah che tha thawkhat mah se tihsual neih a ching a, a pawimawhna hloh zui thuai. Kum 2004 phei kha chuan Roy Carroll a nekchhuak zo lo va. 2005-ah Van der Sar an lak luh zui leh tak vangin United-ah a hming ri zui tawh lo va, pawimawhna a nei zui tawh lo.
5. Roy Carroll
Howard nen an inelnaah chungnung zawk niin United si nghak duh thlan a ni a, 2004-05 season phei kha chuan khawih chet thiang lo ang tluk a ni. Hun a kal a, tihsual a ngah tak em vangin a pawimawh lo telh telh a, May 2005-ah khan United hian an chhuah zalen ta hial a ni.
4. Andre Onana
United in David de Gea chu tihsual neih khut a chin vangin an chhuahtir a, a hmunruak luah turin Cameroonian Andre Onana an la lut. Onana hian beisei a phak ta lo viau thung a, ho tak taka chhuah a ching ta hle. Tihsual a hrat vangin David de Gea ne pawh a tluk rih lo a ni ber mai. Season liam taa United chetchhiat chhan pawh si nghak an neih tha loh vanga puhtu an tam hle. United chetchhiat chhana an puh, an si nghak chu Onana hi a ni.
A tir lamah Onana hian beisei phak lo viau mah se a insiamtha chak viau thung a. EPL 2024-25 season ah clean sheet ngah ber a ni mek. Manager thar Ruben Amorim hnuaiah hma a sawn leh zual a nih chuan United si nghak beisei phak lo zual huang atangin paih bo theih a nih ngei a rinawm.
3. Fabien Barthez
Lu khawlh vul mai, si nghak hmel chhe lem lo tak Barthez hian World Cup leh Euro-ah France a champion pui a, inrintawkna a nei sang vet vet hle. Inrintawkna sang tak a neih lai hian Manchester United a zawm a, Peter Schmeichel thlaktu ni turin a inring tawk hle nghe nghe. United a zawm hnuin a beisei ang ngawtin thil a kal ta lo thung. United hi EPL champion nihpui bawk mah se, champions league quarter-final first leg-ah Real Madrid an hmachhawn tumin goal thum ngawt a chhuah a, hemi hnu hian United tan a khel zui tawh lo.
2. Victor Valdes
Barcelona tana vuk tak Victor Valdes hi kum 2014 khan beiseina sang tak nen an la lut a, United-ah a ropui zui tawh lo. United a zawm hnuin first choice a ni phak ta miah lova, hliamin a lo tibuai ve bawk nen a ui chuang awm vel mai mai a ni ber a. Reds Devils tan hian EPL-ah vawi hnih chiah a khel. Louis van Gaal-a’n United a enkawl khan Vanldes hi intuai thar lehna hun a pe a, fiahna hun a siamsak. Duhsak viau mahse Van Gaal pawh hi a beidawng zui ve leh thuai a, “ka philoshophy a hrethiam phak lo’ tiin a comment zui ta hial a ni.
1. Massimo Taibi
United hian hliam vanga chawl mek Bosnich hmunruak luahtu atan kum 1999 khan Italian tawnhriat nghah Massimo Taibi hi Venezia atangin an la lut a, a manah £4.5m ($5.4m) an seng. A man hi tunlai ngaihtuahin tlem viau mah se a hun lai erawh hi chuan a tlem lo viau thung. Beiseina sang tak nena an lak luh Taibi hian United tan a khelh hmasak berah Sami Hyppia cross chu ho zetin a chhuah a, a chesual nghal. Hemi tum hian Jamie Carragher own goal pahnih hmangin United hian hnehna an chang hram a, Taibi hi ‘Man of the Match’ ah thlan a ni.
United tan a khelh hmasak berah chetha thawkhat mah se a che chhe zui viau a, inkhel pali lek atangin goal 11 zet a chhuah ta mai a, United si nghak che chhe ber a ni ta hial. A chetchhiat vangin hmun a chang zui tawh lova, a man nen chhutin vawi khat a khelh nan United in £1m zel an seng anga chhut a ni hial a ni. A chetchhiat em vangin The Sun chuan ‘The Blind Venetian’ tiin a hming lem an vuahsak hial a ni.