University chhungah hreiin thawktu chek hlum

University chhungah hreiin thawktu chek hlum
University of Warsaw, Poland-a hreia inbeihna thlenga hmeichhia thah a ni tih police-in an sawi.
University chuan thi hi an hnuaia thawk niin main campus building-ah Nilaini zan khan beih a ni tih sawiin a puitu, university vengtu pakhatin na takin hliam a tuar bawk.
Kum 22 mi Polish mipa man a ni a. Pawi a khawih chhan hi chiang taka hriat a la ni lo va, amah hi tual chhung prosecutor third-year law zirlai a ni a, Polish ni mah se Warsaw-a cheng a ni.
University chuan beihna hi ‘chhiatna lian tak’ tiin an sawi a. A sun nan Ningani khan zirlai pawh an zir lo.
A beitu hian college campus hi tlai dar 06:40 (India-a zan dar 10:20) hnu hretah a lut a. University-a lecture hall lian ber, Auditorium Maximum building a pan nghal.
Polish chanchinbute chuan hmeichhe thah tak hi kum 53 mi, porter niin a hmunah hian a thi a. Amah puitu hliam tuar hi kum 39 mi a ni.
University chuan he tualthahna hian tute pawh a barakhaih tih an sawi a. “A tuartu chhungte kan tawrhpui tak zet a ni,” tiin rector, Alojzy Nowak chuan thu a chhuah.
Justice Minister Adam Bodnar chuan beihna thlen lai hian a bul lawka lecture theatre-ah hun a hmang nghe nghe a. Thil thleng hi hmu ve lo mah se state protection officer-ten an hrilh tih a sawi.
Amah vengtu officer zinga pakhat, university vengtu pui tura hmanhmawh taka tlan ngam a nei chu a chhuan thu a sawi bawk.
Warsaw Mayor Rafal Trzaskowski chuan zirna in hung chhunga thil thleng chu ‘pawi khawihna rapthlak’ tia sawiin, “Rawng taka mi beihna hi na taka hrem tur a ni,” a ti.
University hian kum tina an neih thin, music festival, Juwenalia chu Zirtawpni leh Inrinni hian thleng turin an inbuatsaih mek a, an thulh phah a ni.