UNNATI loan hmu tarlan zingah Lalduhoma-te hming a lang lo – Congress Thalai

Chief minister Lalduhoma’n a in sakna atan UNNATI scheme-ah loan a hmuh hmanga sak nia a sawi chu a dik loa, loan hmu zingah amah emaw a fapa hming emaw a lang lo tih Congress Thalai chuan an sawi.
Congress Thalai Hqrs. thuchhuak chuan, Nilaini khan Chawlhhmuna chief minister Pu Lalduhoma in sak tlawhin an zirchiang tih a sawi a. He building drawing titu hi Hrangthanga Zote niin, a neitu hi Ruata s/o Lalduhoma a ni a; building hi ground floor tel loin Zopa chhiara chhawng 6 tura duan a ni a, ground floor 66 m2, 1st floor 150 m2, 2nd floor 226 m2, 3rd floor 352 m2, 4th floor 443 m2, 5th floor 504 m2 leh 6th floor 504 m2 niin, building pum zau zawng hi sq.m 2245 a tling tih a sawi.
2021 Serchhip by election-ah khan Pu Lalduhoma hian, pawisa engmah a nei loa, by-election hi a tan a huphurhawm a, general election-a a leiba pawh a la rul zo lo, tiin dinhmun tha lo leh rethei takin a insawi tih sawiin, ‘Khatiang khawpa pawisa nei loa insawi khan chief minister atana lakluh, swearing-in a nih hma hauhin a chenna tur in sakna atan tlang a rawt nghal a, thla khat chhung zing 9.00 atanga zan dar 10.00 chhung a in hmun chhum lo chat loin a lai zui zat thei leh si hian Mizoram mipui mak tih leh rinhlelh a hlawh a. Lengpui ram hralh chungchanga a hralhna man an thlakhlelh thu a sawi leh ZPM sawrkar hlima ram hralh tur hmanhmawh phelenga file an kaltir khan chief minister in sak hi a inzawm ngeiah mipuiin an ngai,’ a ti.
Serchhip by election-a heti taka insawi rethei si hi, tunhnaia journalist-in a kawmnaah chief minister PA (personal assistant) ah kum 6, IPS leh MP a nih bakah MLA-ah vawi nga a tling tawh a, mahni in chu sa ve hle thei tur niin a insawi lian leh si, tiin, hausak thutna a awmah an ngai tih a sawi.
A in sak mek hi SBI hnuaia UNNATI Scheme-ah kum 2025-ah loan an la tia a sawi thu sawi chhawngin, ‘UNNATI hi hotel, home stay, restaurant, hospital, industry dinna atan, industry tihlenna atan (plant and machinery atan bik) loan la ten an loan lak zatve an claim let theihna scheme a ni a. Mi pakhatin vaibelchhe 250 thleng a la thei. UNNATI hnuaia subsidise dil mi 16 awm tawhin mi 3 approve tawh zingah Pu Lalduhoma fapa hming a tel lo. Dilna 4 hnawl a ni a, dilna lut thar a awm bawk. Pu Lalduhoma’n bank-in an lo pe anga a sawi hi thil dik lo a ni,’ Congress Thalai chuan an ti.
Heng an din dawn a nih pawhin, endik thlap niin, sak zawh hnuah sum hi pek chhuah chauh a ni thin tih a sawi a. Pu Lalduhoma’n awlsam tak anga sawia thalaite pawh ti ve tura a sawi hmuh chu thil ngaihthlak nuam tak niin lang mah se, mi bik tan lo chuan tih ve mai mai theih a ni loa, hei pawh hi thiam chan tuma insawimamna maiah a ngai tih a sawi bawk.