UP CM-in Kumbh Mela tui thianghlim lo tia sawi pha

UP CM-in Kumbh Mela tui thianghlim lo tia sawi pha
Uttar Pradesh chief minister chuan khawvela mihring punkhawmna lian ber, Kumbh Mela an thlen meka an inbualna hmuna tui chu a bawlhhlawh lutuk nia sorkarin report a siam chu a dik lo tih a sawi.
Report-ah hian Hindu lui thianghlim, Prayagraj khawpuia Sangam-a an inbualna hmuna tui chu tui bawlhhlawh leh bacteria tam tak awm, inbualna atana tlak loh niin an tar lang a ni.
Nilaini khan Chief Minister Yogi Adityanath chuan tui chu inbual nan a tlak lo va; mahse, aachman a tan chuan a tlak tih a sawi a, hei hi Hindu sakhaw tih dana inbual zawha kuta tui thala suah an sawina a ni.
Thuneitute chuan January 13 atanga festival tanah mi maktaduai 565 vel an inbual tawh tih an sawi.
Kumbh Mela (Mahakumbh tia an sawi bawk) hi kum 12 dan zela neih thin a ni.
Hindu-te hian India-a an sakhaw lui thianghlim ber, Ganges leh Yamuna leh an sakhaw lui pawimawh, Saraswati intawh khawmna Sangam-a inbual hian an sual a tleng fai a, an thinlung tithianghlimin chhandamna an chan theihna atan a pui niin an ngai.
Chawlhkar ruk awh Mela hian India bakah khawvel ram hrang hranga Hindu-te a hip khawm thin a. Ni tin mi maktaduai tel inbual ziahin February 26 thleng a awh ang.
Hetih lai hian hriselna lam ngaihtuahtu leh khuarel himna atana thawktute chuan a tui thianghlim tawk lo chu an ngaihtuah hle.
Mela tan hma khan India-a environment court sang ber chuan sorkar laipui leh state sorkara pollution control board-te chu a tui him dan tawk uluk taka vil tur leh a thianghlim tawkna tura hma la reng turin an ti.
Hetih lai hian thla tira Central Pollution Control Board (CPCB)-in report a siamah chuan Ganges leh Yamuna luia tuiah chuan coliform level a sang lutuk niin an sawi.
Coliform level hi tuiah bawlhhlawh leh leh faecal bacteria a tam leh tam loh sawina a ni.
Report-ah chuan Ganges-a coliform level chu a pawm theih chin aia a let 1,400-a sang niin an sawi a, Yamuna tui pawh a let 660-in a sang niin an tar lang bawk.
CPCB hian January thla khan ni nga dan zelah sample lain a endik ziah a, coliform level hian a tha tawk pangngai a pel ziah niin report-ah hian tar lan a ni bawk.
Chief Minister Adityanath-a erawh chuan lui tui hi a sorkar chuan a thianghlim tawk theih nan a bei reng a, a vil reng tih a sawi.
“Sangam leh a chhehvela tuidawt leh luikawr zawng zawng chu herh haw veka tih a ni a, tui hi tihthianghlim hnuah chauh chhuah thin a ni,” a ti.
“Faecal coliform a pun chhan hi a tam thei ang a, tui thianghlm lo put avang leh ran thli vang pawh a ni thei a; mahse, Prayagraj-a faecal coliform hi a tha tawk pangngai a ni,” a ti.
Eptu party-ten Kumbh Mela tihhmingchhiat tumin thu dik lo an thehdarh mai mai niin a sawi.
Tun hi Uttar Pradesh sorkarin Kumbh Mela a huaihawt leh a thlen dan sawisel a tawh vawi khatna a ni lo.
January khan inbual hun ni pawimawh bikah Sangam bul lawkah innek buaina thlengin mi 30 vel an lo thi tawh.
Pathianni khan New Delhi Railway Station-ah Prayagraj pan tur rela chuan tum mi sang tel innek buaina thlengah mi 18 vel an thi leh bawk.