UPSC member leh governor neih theih nan hma la dawn – MNF senior vice president

MNF MP candidate K Vanlalvena thlantlin a nih chuan Union Public Service Commission member-ah leh lieutenant governor/ governor ah Zofate kan awm theih nan hma a la dawn tih MNF senior vice president Dr R Lalthangliana chuan a sawi.
MP inthlan atana campaign Dr R Lalthangliana chuan tribal zingah UPSC member an awm thin a, MNF MP candidate thlantlin a nih chuan UPSC leh central service-a Zofate kan luh tam theihna’n theihtawp chhuah a tum tih a sawi. “India ram literacy rate-ah pahnihna rei tak kan hauh chung pawhin UPSC-ah member pakhatmah kan la awm lo hi thil inhmeh lo tak a ni a, kan tum chuan thil har lutuk a ni lo. Pu K Vanlalvena thlantlin a nih chuan UPSC-ah Mizote member kan awm ve theihna’n theihtawp a chhuah dawn,” a ti.
Mizoramah academician thiam tak tak leh kawng hrang hrangah mi ropui tak tak kan awm tih MNF hruaitu hian sawiin, khawi state leh UT berah emaw chuan lt. governor/ governor kan awm theihna turin, MP-a Pu K Vanlalvena thlantlin a nih chuan theihtawp chhuahin hma a la dawn tih a sawi bawk.