Uric Acid level sang: A chhan, symptom leh enkawl dan

Uric Acid level sang: A chhan, symptom leh enkawl dan
Uric acid level a san lutuk chuan gout a thlen thei a, kal (kidney) tan a pawi thei bawk. Uric acid chu kan taksa a purines atanga bawlhhlawh lo insiam a ni a, purine chu kan ei leh in thenkhat, purine pai chi atanga kan lak luh a ni. Chung purine-te chu kan kal-in ama tawkin a lo paih chhuak ve mai thin a, mahse, ka thisen a a lo tam tak lutukah chuan emaw, kan taksa atanga a inpaih chhuah that loh emaw chuan uric acid level a lo sang ta thin a, chu chu hyperuricemia an ti a, gout, kala lungte awm, ruh chuktuahna leh thildang te pawh a thlen thei. Engkawl loha a awm reng chuan uric acid hian taksa peng hrang hrang a khawih chhe thei a, a symptom a lang har thin riau lehnghal. Tun tumah hian Times of India-in uric acid tisang thei chaw, a lanchhuah dan leh enkawl dan tur an tarlan te kan rawn tichhuak e.
Uric Acid sanna chhan: Purine pai tam chi kan ei nasat avang a ni duh hle. Heng- sati sen (red meat), seafood leh sa kawchhung, thil in tur leh eitur thlum chi- a bik takin fructose corn syrup an hman tamna te, zu lam chi in tam vang te pawh a ni thei. Heng bakah hian taksa a tuiril tlem (dehydration) avangin uric acid level a sang thei a, mi thau lutuk, kal lam natna nei, BP sang nei, metabolic syndrome leh psoriasis te hian uric acid level a tisang thei bawk.
A lan chhuah dan: Uric acid sang tam tak chuan a symptom hi an nei nghal mai lo a, mahse, a level chu eng emaw chen a san tak viau hnuah chuan gout (ruh chuktuah na leh vûng, a bikin ke zungpuiah a ni duh lehzual), kala lungte awm, chau leh nuam lo, damlo dawn anga inhriatna, ruh chuktuah khawng (zingkarah a ni duh lehzual) te hi a lanchhuah dan tlangpui a ni.
Engtia inven/enkawl tur nge: Uric acid level tihniam turin kan ei leh in leh khawsak phung tihdanglam deuhin kawngro a su thei hle a, purine pai tam chi in leh ei tam loh tur a ni. Sati sen, sa kawchhung, sangha thau mawm te ei tam loh a tha. In tur thlum chi- Coca Cola, Pepsi, Fanta, Sprite etc te in tam loh tur a ni a, thil tih thlum dang pawh ei tam loh tur a ni.
Tui in tam tur a ni a, hei hi a pawimawh hle. Kan kal hian uric acid 70% vel chu a paih chhuak thei a, chuvangin kalin uric acid a paih chhuah that theih nan tui kan intam a ngai. Ni khatah tui no 8-10 tal in tum ang che.
Zu in loh a tha ber a, in lo thei lo tan chuan in tam loh tur a ni a, beer phei chu in loh tawp a tha zawk. Zu lam chi-ah hian purine a tam mai bakah kan taksa atanga uric acid paih chhuah tur a tibuai thei. Taksaah lactic acid a tipung a, lactic acid leh uric acid te chu kalin a paih chhuah ve ve a ngai a, kal hnathawh a tibuai thin.
Thau lutuk (overweight) tan intihcher deuh a tha. Mithau zingah uric acid level a sang duh lehzual. Taksa a thau chuang a tam chuan kal hnathawh a tibuai a, uric acid a insiam tam duh bik.
Zunthlum nei-ah uric acid hi a sang duh riau a, chuvangin blood sugar level control that tur a ni.
Fibre pai tam-oats, theirah, thlai hnah, whole grain leh legumes, theithur, strawberry, bell pepper te hi uric acid level tihhniam nana chaw tha an ni.
Vitamin C hi antioxidant chak tak, uric acid level tihniam thei a ni. Kal hnathawh a tichak a, chuvangin uric acid paihchhuah a tichak thei. Mahse, mahni thu a ei ngawt lovin doctor rawn hmasak tur a ni.
Cherry-ah hian anthocyanins a tam a, chu chu compound antioxidant leh anti-inflammatory properties nei a ni. Mithiam ten zirchianna an neihah cherry hian uric acid level a tihniam thei a, gout attack awm tur te pawh a titlem thei. Vitamin C leh fibre a pai hnem bawk.
Kan taksah uric acid sang symptom kan nei a nih chuan doctor rawn tur a ni a, a inenkawlnaah pawh mahni duhdan a timai lovin doctor rawn thin tur a ni.