US-ah lian takin Trump-a duh lohna lantir

US-ah lian takin Trump-a duh lohna lantir
Inrinni (India-a Pathianni zing) khan US-a hmun tam takah President Donald Trump-a duh lohna lian tak lantir niin January-a a pisa a luah atanga amah duh lohna lantirna lian ber a ni.
‘Hands Off’ protest an tih hi US-a state awm zawng zawnga hmun 1,200-a neih tum a ni a. Boston, Chicago, Los Angeles, New York, Washington DC leh khawpui lian dangah mi sang tel an thawk chhuak.
Duh lotute hian Trump-a’n vantlang leh economy-a thil a kalpui dan hrang hrang an duhte an tar lang hlawm.
Trump-a hian tun hnai lawkah US-a bungraw thawn luh man (import tariff) chu khawvel ram tam zawk tan a tisang a. US pawn lamah pawh London, Paris leh Berlin-ah te amah duh lohna hi lantir a ni.
Boston-ah chuan mi thenkhat chuan ram dang atanga pemte um chhuah tumna kawnga US university zirlaite luh chhuah a nih duh lohna an lantir uar hle.
London-ah chuan ‘WTAF America?’, ‘Mi tihnat titawp rawh’ tih leh ‘Mi mawl a ni’ tih thuziak intar te an tilang a. Trump-a’n ram dang a dawr dan duh lohna lantir nan ‘hands off Canada/Greenland/Ukraine’ tiin an au rual bawk.
Mipui ngaihdan lakna thenkhatah President Trump-a hi a dinhmun a hniam hret tih pawh hmuh theih a ni.
Kar hmasa tira Reuters/Ipsos poll tihchhuahah chuan amah pawmna hi 43%-ah tlahniamin January-a a vawi hnih nana president a nih leh hnua a hniam lai ber a ni a. January 20-a lak luh a nih lai khan 47% a ni.
He poll-ah vek hian American 37% chuan eibar a kalpui dan an pawm a, 30%-in US-a khawsakna man tihhniam tuma hma a lakna an pawmpui bawk.
Harvard Caps/Harris-in tun hnaia ngaihdan a lakah chuan 49%-in Trump-a chet dan chu an pawm a, thla hmasa kha chuan 52% a ni thung a. He poll vek hian president an nih chhungin Joe Biden-a aiin a che tha nia ngaitu 54% an awm bawk.
Trump-a hian Inrinni khan vantlangah hun a hmang lo va, Florida-a a chawlh hmannaah golf a khel daih a, Pathianni pawh khan a khel leh.