US-AID hmalaknaa Covid vaccine pek dan thlirlet

US-AID hmalaknaa Covid
vaccine pek dan thlirlet
Mission Foundation Movement buatsaihin Thawhlehni khan Aizawlah Momentum Routine Immunization Transformation and Equite (MRITE) program hmanga Covid immunization kalpui dan thlirletin sawi ho a ni.
He hun hmanpuitu Health minister Dr R Lalthangliana chuan Mission Foundation Movement (MFM) in Covid len vanglaia mahni intumchawpa Covid kaihhnawih damlote enkawltu tur nurse leh health worker engemawzat an tirh chhuah avangin lawmthu a sawi. Mitinin Covid vaccine an dawn theih nan MRITE program tha taka an kalpui avang pawhin lawmthu a sawi bawk.
Covid vanglai khan United States Agency for International Development (US-AID) chuan India rama he hri do na’n sum, vaibelchhe 180 chuang a pek hmangin Union Health ministry leh state-a Health department te thawhpuiin ram chhung hmun hrang hrangah vaccine a sem a. MRITE project kalpuiin tar chak lo, rualbanlo, harsatna hrang hrang avanga mipui vantlang pawh pha ve lo ten Covid vaccine an dawn ngei theihna’n tan an la a. India ram state 18-a district 241 an tuam a ni. Mizoramah chuan MRITE project hi district 5-ah kalpui a ni a. MFM leh Church’s Auxiliary for Social Action (CASA) chuan John Snow India Private Limited (JSIPL) kaltlangin MRITE program an kalpui a. MFM hian Lunglei, Mamit leh Kolasib changin, CASA hian Siaha leh Lawngtlai district an chang thung. He project hi February 2022 khan bul tan niin tunah hian a thawh thumna a kal mek a, kumin May 23 hian zo thei tura ngaih a ni.
MFM bik hian Kolasib, Mamit leh Lungleiah belhkhawmin Covid vaccine 35671 an pe chhuak tawh a ni.
Hnathawh thlirletnaah hian JSIPL leh USAID India hotuten thu an sawi a. Thupui hrang hrang thlanbik hmangin state chhung leh pawn atanga mithiamten zirtirin workshop an hmang chhunzawm a ni. Lunglei, Siaha, Kolasib, Lawngtlai leh Mamit atangin district immunization officer-te leh Village Council president te, tlawmngai pawl hruaitu leh kohhran hruaitute an tel a ni.