US economy tichhetu chu Trump a ni

US election atana campaign kal zelah vice president ni lai leh presidential candidate ni bawk Kamala Harris chuan na taka Donald Trump beiin, US ram economy tichhetu lian tak a ni, a ti a. Hemi kawngah hi chuan a hlawhchham chiang hle a ti.
Kamala chuan Trump chu America economy chhiatna hmahruai nia sawiin, ram ropui hi a kaihhruaina hnuaiah chuan economy-ah kan sang thei lovang, chuvang chuan Republican lam hian an ngaihtuah chiang lo a ni, a ti bawk.
Ram hran atanga lakluh kan ngah hi inchhuanna chi a ni lo a, US chuan ram hranah a thawnchhuak zawk tur a ni, tiin. Trump-a kaihhruaina hnuaiah chuan khawsak vantlangte tan an ipte puarna tur a awm dawn lo a, a neisate bawkin an neih belh dawn tih a chiang reng, chuvang chuan Trump-a hi vote tlak a ni lo tiin a sawi.
Kamala Harris hian Democratics lam chuan term kal meka kan tih zawh hman lohte kan tih zawh theih nan theihtawp kan chhuah mek a ti a, khawsak hnuai lamte thleng phak economy hi kan ngaih pawimawh a nih avangin, mi hausa sate neih belh theihna hi kan thupui a ni ve lo, tia sawiin, a elpui Trump-a chu hausak vanga neih belh lehzual tumah a puh nasa hle bawk.