US GP-ah Leclerc chak ber

US GP-ah Leclerc chak ber
Tun Pathianni liamta khan Formula One race an chhunzawm a, United States Grand Prix-ah driver standing-a pathumna luahtu Ferrari driver Charles Leclerc chu pakhatna niin, a team-mate Carlos Sainz chuan a dawt a, Texas state khawpui Austin-a Circuit of the Americas-ah Ferrari one-two kan thlirliam a nih kha.
Formula One championship hmahruaitu Max Verstappen chuan title race-a a elpui lian ber Lando Norris hmakhalh zo loin palina dinhmun luah mah se pathumnaa thleng McLaren driver Norris hi Dutch driver ropui a lehpelh danah tlankawng pawna tlanchhuakin dan a bawhchhia a, five-second penalty pek a nih avangin Red Bull khalhtu Verstappen chuan chuan lawmman semna dawhsan hniam ber a luah phah ta a, Briton Norris hi palina a ni.
Intlansiak vawinga la awmah hmahruaitu Verstappen hi point 57-in amah hnaihbertu Norris lakah a sang a, title battle erawh a la nung tha.
McLaren driver Oscar Piastri chu Austin tlankawngah hian p angana niin, a hnung chiahah Mercedes car khalhtu George Russell a thleng a, pasarihna chu Red Bull driver Sergio Perez a ni.
Nico Hulkenberg pawh point hlu tak thawkchhuak zingah telin, US team Haas tan pariatna a luah a; New Zealander Liam Lawson pawhin Red Bull team pakhat zawk RB chu pakuanaah a thlenpui.
He race-a point hniam ber hmutu chu Williams car khalhtu leh Argentine rookie ni bawk Franco Colapinto a ni.
Tun kha Leclerc tan season kal laia a vawithum chakna ni ve tawhin, Monaco leh Monza lamah pakhatna dinhmun a lo luah tawh a, US Grand Prix intlansiak hnuhnung pathumna chakzawn Verstappen-a ropui leh tur a dangchat ta a ni.
Constructors’ standing lamah McLaren chuan hma an hruai chhunzawm zel a, anmahni hnaihbertu Red Bull lakah point 40-in an sang tawh.
Kartawp hian Mexico City-ah race an tlan leh dawn a; he grand prix atan hian qualifying leh Sunday race hmain practice session vawithum a awm ang.
Mexico zawh hian Brazil lamah driver-te an chhuakkhawm zui leh ang a, sprint race an tlan tel leh dawn a ni.