US hrekna avangin India-in Russian tuialhthei lei tlem dawn?

US hrekna avangin India-in Russian tuialhthei lei tlem dawn?
US-in Russian tuialhthei company lian pahnih a hrek hnuah Indian thlifimtute pawhin Russia atanga an lei thin chu tihtlem an tum nia sawi a ni a. Tuialhthei hi sumdawnna thila India leh US an inpawhna nasa ber a ni mek.
India hi US chuan an ram thil a lak luhah chhiah 50% a laksak mek a, heng zinga a zahve hi Moscow atanga tuialhthei a lei avangin hremna atana a tih a ni a. Ram pahnihte hi sumdawnna thilah indawr mek reng niin Washington hian Moscow tuialhthei hi leisak tawh lo se a duh hle a ni.
India hi kum 2022 atanga Moscow-in Ukraine a rûn hnu atang khan tuipui atanga lak chhuah Russian tuialhthei thlitfim loh leitu tam ber a ni a, kumin thla kua chhung khan ni tin barrel maktaduai 1.7 chuang a leisak ziah.
US-in Ningani atanga a hrek thar pahnih hi Lukoil leh Rosneft niin Russia-a tuialhthei thar tam ber pahnih an ni.
Mi mal ta, India atanga leisaktu tam ni mek, Reliance Industries chuan Russian tuialhthei lei a titlem dawn nia sawi a ni a, hengz ingah hian Rosneft nena rei tak daih tur inleisakna inremna an lo neih tawh pawh a nghawng dawn nia sawi a ni.
“Russian tuilahthei lak luh hi sawiho mek niin Reliance hi Indian sorkar kaihhruaina hnuaia kal zel a ni,” tiin Reliance thupuangtu chuan an leisak tlem tan dawn em tih zawhna a chhang.
Indian sorkar hnuaia mi, Indian Oil Corp, Bharat Petroleum Corp leh Hindustan Petroleum Corp pawhin an leisak thin zat hi ennawnin US-in Rosneft leh Lukoil a hrekna an zir chiang mek nia sawi a ni a.
Billionaire Mukesh Ambani-a ta, Reliance hian Gujarat-a Jamnagar-ah khawvela tuialhthei thlitfimna hmun lian ber an nei mek a, Rosneft nen hian kum tam tak daih tur, ni khata barrel 5,00,000 dawn leina tur inremna an lo siam tawh a. Hmun dang atang pawhin Russian tuialhthei hi an lei bawk.
Tun hnaiah Reliance hian Middle East leh Brazil atangin a lei thar tan a, hei hi Russia atanga an lei thin thlakna atana an kalpui dan niin sumdawng thenkhat chuan an sawi a. Ningani pawh khan Middle East-a sumdawngte an dawr thar nia sawi a awm bawk.
Indian thlifimtu dang, Nayara Energy pawh Rosneft atanga lei tam an ni a, anni hian lei an titlem dawn em tih an la sawi lo.
Sorkar hnuaia thlifimtute erawh chuan Rosneft leh Lukoil hi anmahniin an dawr mang lo va, mi dang kaltlang erawh chuan an lei ve tho thin bawk.
Indian oil ministry leh an hnuaia thlifimtute chuan engmah sawi an la nei lo.
“Lei tlem a ni ngei dawn a, leisak tawh loh chu a ni lo vang a, a tlem tawh dawn,” tiin hemi lam hre chiang pakhat chuan Reuters hnenah a sawi tawh thung.
Rosneft leh Lukoil hi India-in Russian tuialhthei a leisak zawng zawnga 60% chuang tumtu an ni tih ICRA Ltd Vice President Prashant Vashisth-a chuan a sawi.
“India hian Russia thlak turin Middle East leh ram dang a zawng thei a, lak luhna man erawh a sang hret thei dawn a. Kum khat chhunga lak luhna man sang tur hi tuna a leina aiin 2% aia tlemin a sang ang,” a ti.