US-in a ralthuam Ukraine-in a hman remti

US President Joe Biden chuan American in ralthuam a pek te chu Russia ram chhung kah nan Ukraine-in a hman phalna a pe a, mahse, Kharkiv region-ah chauh hman a phalsak tiin US official te chuan an sawi.
US ralthuam te chu Russian forces tena Ukraine kah an tum emaw an kah emaw chuan chhanlet nana Ukraine-in a hman a remti ta a ni.
Tun hnai karah Russian forces te chuan Kharkiv region-ah hmasawnna nasa tak neiin a bik takin Russia ram ri hnaiah hma an sawn chak hle a ni.
Zirtawpni khan Ukrainian official te chuan Russia-in Kharkiv City daifema residential building a kah avangin mi pathumin nunna chanin mi 16-in hliam an tuar tiin a sawi.
US official te chuan Russia ram chhunga Army Tactical Missile System [ATACMS] emaw long-range strike hman leh kalpui chungchanga kan policy kan la thlak danglam lo tiin an sawi bawk a.
Tuna US-in remtihna a pek tharah Russian aircraft te beih a tel em tia zawhna chu official te chuan “Ukraine te hnenah hian anmahni bei tur akal Russian airplane te Russia ram chhunga an la awm laiin in kap thei lo tiin kan hrilh ngai lo” tiin a sawi bawk.
Tun hnaiah UK pawhin Ukraine hnena a ralthuam pekte hman a nih theih dan tura khuahkhirhna a siam te chu thlahdul a tum thu a lo sawi tawh bawk a. Tun hnaiah European leader hrang hrangte chuan ralthuam hman khuahkhirhna thlahdul ni se an ti hlawm bawk.
Mahse Ukraine hnena ralthuam pe hnem ber Washington chuan Russia nena inbakkaihna nasa zual zawka a alh hlauthawngin Ukraine hnenah khuahkhirhna a thlahdul duh mai lo char char zawk a ni.
Nilaini khan US Secretary of State Antony Blinken chuan Moldova a tlawhnaah an policy an thlak theih thu lo sawi tawhin, “A tul dan ang zelin kan insiam rem zel a, chutak chu hmalam panna zela kan tih tur a ni bawk” tiin a lo sawi tawh bawk a ni.