US-in China hnawl

United States chuan Arunachal Pradesh chu Indian Territory ah a pawm a, Line of Actual Control namnul tumna chu khauh takin a dodal tiin tun hnaia Prime Minister Narendra Modi an Arunachal Pradesh a tlawh hnu lawka Chinese military tena an sawiselna chu a chhang let a ni.
Tunkar tir lam khan Chinese Defence Ministry thupuangtu Senior Colonel Zhang Xiaogang chuan Xizang chhim lam (China in Tibet a sawina) hi China territory a ni a, Beijing chuan India in Arunachal Pradesh a tih hi a pawm lo va, a hnawl thak a ni tiin a sawi.
China chuan Indian leader tena Arunachal Pradesh an tlawh thin chu an duhlohna an tilang ziah a, Arunachal Pradesh hi China chuan Zangnan tiin a sawi.
March 9 khan Prime Minister Modi chuan Sela Tunnel, Arunachal Pradesh a 13,000 feet a sanga awm Tawang awlsam leh eng hun lai pawha tlawh pawh theihna tur chu a hawng a. He tunnel hmang hian frontier region chuan awlsam zawkin chakkhai a lakhawm thei tawh dawn a ni.
US State Department Principal Deputy Spokesperson Vedant Patel chuan, “United States chuan Arunachal Pradesh chu Indian territory ah a pawm a, chu mi namnul zawnga thil kalpui tumna reng reng military emaw civilian kaihhnawih a ni emaw a hnawl bur a ni” tiin a sawi.
India chuan China in Arunachal Pradesh a ram huam chhung anga a chhal chu tum tam a hnawl thu sawiin India ram bung a ni a ti bawk a. New Delhi chuan Beijing in Arunachal Pradesh hming a phuah thar pawh a hnawl thu a sawi bawk.
Ministry of External Affairs chuan Thawhlehni khan Chinese Defence Ministry thupuangtu thusawi chu an hnawl thu sawiin Arunachal Pradesh chu India ram bung lak hran theih loh a ni tiin a sawi bawk.