US-in eng hlawhtlinna mah an chang lo – Iran supreme leader

US-in eng hlawhtlinna mah an chang lo – Iran supreme leader
Iran-a supreme leader chuan an nuclear hmunte an beih avangin US-in ‘hlawhtlinna engmah an chang lo’ tiin a sawi a, hei hi Thawhlehnia Israel nen inkahhai an puan hnua vantlang hmaa thu a sawi hmasak ber a ni.
Ayatollah Ali Khamenei-a hian an hmun beih chuan Iran-in nuclear programme a neih ‘engtin mah a tikhawlhkham lo’ nia sawiin a chhan let nana Qatar-a American air base an beih chu an tan chuan ‘a na hle’ tih a sawi.
Iranian hotuin hetiang a sawi hma lawk hian Washington chuan an chetna chuan Iran-in nuclear a kalpui dan a tikhawlhkham nasa hle niin a sawi.
US Defence Secretary Pete Hegseth chuan US leh Israel chuan ‘nuclear programme tibuaiin kum tam takah a hruai let leh’ nia an sawi thu a sawi.
A hmain US President Donald Trump-a chuan Iran-a nuclear hmun pawimawh pathum chu an ‘chhut chimih vek’ thu a sawi a, American thuneitute, an hming tar lan lohten eng tham an tichhe lo nia an sawina pawh na takin a khak let.
Pentagon-a senior general Dan Caine-a nen Ningani tuka thuthar lakhawmtute an kawmnaah Hegseth-a chuan an tum chu ‘a hlawhtling hle’ tih sawiin ‘Iranian-ten an hmun an tihchangtlun chu hna thawh zui theih lohnaah’ a chantir niin a sawi.
June 13-a Israel-in an ram a beih hnua vantlang hmaa inlan tam lo tak, Khamenei-a chuan TV-a thuchah a sawi chu Ningani tuk khan tihchhuah a ni.
Supreme leader hi bunker-ah awmin mi a be tam lo nia sawi a ni a, a awmna chin pawh hriat a ni lo nia sawi a ni bawk a. Iranian thuneitute chuan Ningania a thuchah a sawina hmun pawh hi an sawi lo va; mahse, hotu lawk pakhat chuan kar tirah khan hmun himah a awm thu a sawi thung.
Khamenei-a hian video-ah hian Iran chu beih leh a nih chuan Middle East-a US hmunte an bei zel dawn tih a sawi a, Israel leh US lakah hnehna an chang tih a sawi bawk.
Trump-a chuan thil a sawi uar nia sawiin, “Engmah tihchhiat an nei lo va, an tum an tihlawhtling lo,” a ti.
Qatar-a US air base an beih chungchang sawiin, “Hei hi chu nakinah pawh kan la tihnawn leh theih a ni a, beihna a thleng leh a nih chuan hmelma leh min beitute chuan a man an tel ve zel ang tih hi rinhlelh rual a ni lo,” a ti.
Israeli Prime Minister Benjamin Netanyahu-a’n ‘dan a nih loh chuan hun rei lo teah Iran-in nuclear ralthuam a nei dawn’ tia a sawi hnu lawk, June 13 atang khan Iran leh Israel hi an indo zui.
Hemi hma hian khawvel puma nuclear thlithlaitu pawla board of governors chuan Iran hian kum 20 chhunga a vawi khat nan a him chin an pel tih a sawi bawk.
Iran erawh chuan an nuclear programme chu civil mite tan a nih thu leh ralthuam siam an tum ngai loh thu a sawi thung.
Ningani khan Iran hian parliament-ah an ramin International Atomic Energy Agency (IAEA) a thawhpui a tihtawpna tur an pawm zui a, heti a nih chuan an hmunhmate chu endik a rem tawh dawn lo.
Iran-a health ministry chuan ni 12 an indo chhungin mi 610 an thi niin an sawi a, Israeli thuneitute chuan an ramah mi 28 an thi ve bawk tih an sawi.
US hi kar kal ta Inrinni khan indonaah inrawlh vein Fordo, Natanz leh Isfahan nuclear hmunte a kap a, a hnu lawkah Trump-a chuan Israel leh Iran inkahhai a awm theih nan a bei zui.