US-in Greenland neih a tumnaah European-ten Denmark tan

US-in Greenland neih a tumnaah European-ten Denmark tan
European ram parukte chuan US-in Greenland thunun tumna a tharthawh leh mekah Denmark lam an tang tih an sawi.
“Greenland hi a mipuite ta a ni a, Denmark leh Greenland chauhvin an inkungkaihna thilah hian thutlukna an siam thei a ni,” tiin UK, France, Germany, Italy, Poland, Spain leh Denmark hruaitute chuan thuchhuah intawm an siam.
Pathianni khan Donald Trump-a chuan US-in Nato member Denmark atanga inawpna hran nei, Greenland chu venhimna thilah ‘an mamawh’ tih a sawi a ni.
Tharum hmang pawha hnehchhuh mai pawh a hnial lo tih a sawi a, Danish Prime Minister Mette Frederiksen-a chuan Thawhtanni khan US-in a beih vaih chuan Nato tawpna tur a nih thu a sawi ve thung.
Nato hi Atlantic tuipui hrula ramte sipaia an tanhona niin an zinga mi tu pawhin pawn lam atanga beihna an tawh chuan inpui zel tur an ni.
Greenland hma lam hun hi US-in sipai chakna hmanga Venezuela luta an president, Nicolás Maduro-a mana New York-a ralthuam leh ruihhlo tawlh thubuai remsak tura an hruai atangin a ri thar leh a ni.
US sipai chetna hian Greenland pawh sipai chakna hmang veka thunun tuma a beih mai hlauthawnna a awm thar a ni.
Thawhlehnia thuchhuah intawm siamtu ram paruk hruaitute chuan US-in Arctic himna a duh chu thil tha a nih thu an sawi a; mahse, hei hi US pawh a telna, Nato tangrualin a huhova an tih tur a nih thu an sawi.
Greenland Prime Minister Jens-Frederik Nielsen chuan thuchhuah intawm hi tha a tih thu leh ‘inzah tawn taka inbiak’ a tul thu a sawi.
“Greenland dinhmun hi khawvel dan ang leh ram hrang a nihna dinhmun zah tak chunga indawrna nena sawiho ngei tur a ni,” a ti.
Trump-a chuan Greenland hi US rama siam chuan a awmna hmun avang leh hightech thila leilung hausakna a neih avangin American himna atan a tangkai dawn tih a sawi.
Trump-a sorkarin tun hnaia Greenland-a special envoy a dah pawhin Denmark a tithinrim hle a ni.
Greenland-ah hian mihring 57,000 vel chengin kum 1979 atang khan ro inrel hranin an awm a, an ram invenna leh ram dang nena inkungkaihna erawh Danish kutah a la awm.
Greenlander tam zawk chuan Denmark atanga indan an duh a, mipui ngaihdan lakah US ram nih duh lotu pawh a tam zawk an ni bawk.