US-in Indian bungruaah 25% tariff a la dawn

US-in Indian bungruaah 25% tariff a la dawn
US chuan India-in Russian tuialhthei leh ralthuam a leisak zel avangin an ram atanga bungrua a lak luhah chhiah (tariff) 25% a la dawn tih President Donald Trump-a’n a sawi.
Truth Social platform-ah US-ah sumdawnna inremna siamna tura hun tawp a siam, August 1 atangin tariff lak tur hi kalpui tan a ni dawn tih a sawi a. India chu thian tha, ‘tariff sang tak la, khawvela la hnem ber zinga mi’ tiin a sawi.
‘Mi tinin Russia chu Ukraine-a mi an thahna tihtawp an duh laiin’ India-in Russian ralthuam leh tuialhthei a la lei zel chu a dem thu a sawi bawk.
US nena sumdawnnaa inremna siam tuma thla eng emaw zat inbe tawh, India atang chhan letna engmah a la awm lo va. Nikum khan US hian India nena sumdawnnaah $ tluklehdingawn 45.8 a hloh a ni.
April thla khan Trump-a hian Indian bungraw lak luhah tariff 27% thleng a lak dawn thu a lo puang tawh a, hei hi a hnuah a tikhawtlai leh a. Zirtawpni hi India leh ram dangte laka chhiah sang tak lak a tumnaah indawrna ni tawp a ni dawn a, inremna an neihpui thei lo a nih chuan tariff sang a laksak dawn a ni.
Tariff an tih hi ram dang atanga bungraw lak luha chhiah chawi thin a ni a. US president hian India laka sang tak lak hi a lo sawi fo tawh a, ‘tariff king’ ti hialin a lo sawi tawh a ni.
April atang khan ram pahnihte hi sumdawnna thila inrem tumin an indawr tawh a, thuneitute chuan thil lawmawm lam a awm tih an sawi a, thenkhatah erawh harsatna an nei.
“Indian lamte nen kan indawr zel a. Insiam thatna tur lam hawiin thil tam tak kan sawiho a ni,” tiin kar tirah khan US Trade Representative Jamieson Greer-a chuan a sawi.
Lo neihna lam leh ni tin mamawh thil chu ram pahnihte mutan a ni.
Kum eng emaw zat kal ta atang khan Washington chuan India-a lo neihna lam thila intah luh a duh thin a, luh pawh a lut thuk viau tawh a. Hetih lai hian India hi mahni inveng tak chungin ei tur kham a neih nan te, khawsakna buai loh nan leh lo neitu maktaduai tel thatpui tur tein thil thil a kalpui tlat.
Kar hmasa khan Indian Commerce Minister Piyush Goyal chuan CNBC hnenah lo neihna kaihhnawih chu India tan chuan a pawimawh a, lo neitute hamthatna tur chu an ‘hum tlat’ tur tur thu a sawi.
Goyal-a chuan news agency-te hnenah India chu Washington nena an indawrnaah a ‘êng lam’ a thlir tlat dawn tih a sawi bawk.
Reuters hnenah India chuan US nena an inbiaknaah hian ‘hma lam a pan chak’ tih sawiin ‘inremna tha tak nena an tawp’ a beisei tih a sawi bawk.
Tun hnai thlengin US hi India-in a sumdawnpui lian ber pakhat niin kum 2024 chhunga an inkara sum che hi $ tluklehdingawn 190 a tling a. Trump-a leh Prime Minister Narendra Modi-a chuan $ tluklehdingawn 500 tlintir an tum.
India hian bungraw eng awm zat, Bourbon whiskey leh motorcycle telin, tariff a lak a tihniam nasa a, US erawh chuan India nena an insumdawn tawnnaah sum a hloh nasat chu Trump-a hian tihhniam a tum hle a ni.