US-in inthlahdul turin India leh Pakistan a ngen

US-in inthlahdul turin India leh Pakistan a ngen
Pahalgam-a mi firfiakten khualzin 26 an thah hnua India leh Pakistan inkar a chhiat mek laiin United States chuan New Delhi leh Islamabad chu inthlahdul turin a ngen.
US Secretary of State Marco Rubio-a chuan Indian Foreign Minister S Jaishankar leh Pakistan Prime Minister Shehbaz Sharif chu Nilaini khan biain US chuan India-in firfiakna a beihnaa thawhpui a duh reng thu leh Pakistan pawh Kashmir-a thil thleng chhuinaah puih a inhuam tih a sawi.
United States hotu lian hian nuclear nei ram inthenawm hi an boruak tidai tura hma la ve ve turin a ngen.
Jaishankar-a nena an inbiaknaah Rubio-a chuan New Delhi chu Pahalgam beihna a tawhah a tawrhpui thu a hrilh a. Firfiak a dona kawngah United States-in thawhpui a beih reng tih a sawi a. Hetih rual hian India-in Pakistan a puh chhe ngawt leh beih tum anga a chetna chu tha a tih loh thu a hrilh tih US State Department thupuangtu, Tammy Bruce chuan a sawi.
Rubio hian India hnenah hian Pakistan nena an inkara boruak tang tak awm tidai tura puih a inpeih thu leh Asia chhim lam himna atana a puih theih reng thu a sawi.
Jaishankar-a chuan Rubio nena an inbiakna chungchang a tar lanah beihna ‘thlentu, a puitu leh ruahmantu’ zawng zawngte lakah ‘dikna hlen chhuah a ni dawn’ tih X-ah a tar lang.
Prime Minister Sharif-a nen an inbiaknaah Rubio-a chu Pakistan chu April 22-a Kashmir beihna dem tur leh chhui hna thawhpuiah a sawm a. US Secretary of State hian ‘Pakistani thuneitute chu engmah intiamkam lawkna awm lova chhuipui a inpeih’ tih a hrilh niin Bruce-i chuan a sawi.
Rubio-a hian Pakistani prime minister hi India nena an inepna boruak tidai tura hmala tur leh inbiaa Asia chhim lam muanna a awm theih nana hma la turin a ngen.
“Ram pahnih hruaitute hian firfiakte rawng taka chetna hi tha an ti lo va. Secretary hian Pakistani thuneitute chhuipui turin a inpeih tih a hrilh,” tih Bruce-i chuan a sawi.
Tar lan tawh angin Pahalgam beihna kha Pakistan-a Lashkar-e-Taiba (LeT) peng pakhat, The Resistance Front (TRF)-in an tiha an chhal hnuah India chuan Pakistan pawh telah a puh a. Islamabad erawh chuan a pha nasa.
Washington pawhin India lam a tan thu sawiin President Donald Trump leh Vice President JD Vance-a te pawhin an dem thu an sawi a, Pakistan erawh an puh ve lo.
India hian a elpui pakhat, China lian zel karah US hi a thawhpui ram a ni a, Pakistan pawh kum 2021-a US-in Afghanistan an chhuahsan hnuah Washington hi a hnaih ve hret hret bawk.
Pahalgam beihna thlen hnuah khan India leh Pakistan inkar hi a chhe hle a. Intelligence report atang chuan Pakistan-a inkulh firfiak pawlte tih nia ngaih a ni.
New Delhi chuan Indus Water Treaty of 1960 chu titawp lailawkin Pakistani visa zawng zawng a titawp lailawk a. Wagah-Attari ramri a khar bawk a, ram pahnih inkar hi a chhe hle.
Pakistan pawhin a chhan let nan a ram chung boruak chu Indian airline-te tan a khar a, ramri-ah silai a hmet puak deuh reng bawk a. Pakistani defence minister chuan India hian sipai chakna hmangin a bei thut thei reng tih a sawi bawk.