US-in Taiwan hnenah ralthuam hralh

US state department chuan Taiwan hnenah drones leh missile $ 360 million hu leitir a remti niin Pentagon’s Defense Security Cooperation Agency chuan a tarlang.
United States hian China-in a hauh Taiwan venhim ngei ngeina dan a nei a, hei hi Beijing tithinrim em em rengtu a ni bawk.
Tun hnaiah China chuan Taiwan chu military pressure nasa taka pe rengin Taiwan thliarkar hnaihah war games a kalpui chamchi a. Thla kaltaa president atana Lai Ching-te lakluh a nih hnuah phei chuan China chuan chetlakna a nei nasa zual a ni.
“Ralthuamte hian a dawngtuin security tha zawk, political stability, military balance leh economic lama hmasawnna a neihtir phah thei dawn a ni” tiin Pentagon agency chuan a sawi bawk.
Taiwan ralthuam lei tur zingah hian Switchblade 300 anti-personnel leh anti-armour loitering munition leh a kaihhnawih equipment $60.2 million hu te, ALTIUS 600M-V drones leh a equipment $300 million hu te a tel a. Loitering munition te hi small guided missiles a target area a a kah tur a chian hmaa thlawk kual thei a ni.
Taiwan defence ministry chuan US in ralthuam a leitir avanga lawmthu a sawi nghal bawk a.
“Chinese communists tena Taiwan hnaiha military operation an neih chamchi karah US ralthuam leite hmang hian rang takin chet kan la thei dawn a, hmelma te kan chhanglet vat thei dawn a ni” tiin Taiwan thuchhuah chuan a tarlang.
Taiwan Strait a remna leh ngelnghehna a awm theih nan China-in a zir a ngai, tiin Taiwan foreign ministry thuchhuah chuan a tarlang bawk a.
“People’s Liberation Army te hian military operation Taiwan leh a chehhvelah nei zui lovin chu chuan helai region ngelnghehna a siam thei dawn a ni” a tiin Taiwan foreign ministry chuan a ti bawk.