US-in Taiwan hnenah ralthuam leitir

United States chuan Taiwan-in amah a inven theih nan $440 million man hu silaimu leitir a remti a.
He ralthuam hralh hi thil liantham a ni lo va, hei aia turu daih hi US chuan Taiwan hnenah a pe tawh thin a. Mahse, United States leh China tena inbakkaihna nasa taka neia inbiakna an kalpui mek laia thleng a ni thung.
Congress hnena hriattirna a pekah State Department chuan Taiwan hnenah hian ammunition kaihhnawih $ 332.2 million man leh wheeled vehicles leh weapons repair na tur $ 108 million leitir a remti tiin a sawi a.
He ralthuam hralh hmang hian Taiwan chuan defence lamah nasa zawkin a inthuam that phah thei dawn a, mahse chu chuan Taiwan region vela military balance erawh a khawih danglam dawn lo tiin US chuan a sawi bawk a.
Heng ralthuamte hian Taiwan-in politics lama ngelnghet zawk, military balance zawk leh economic lama hmasawnna nghet zawk a neihtir phah thei dawn a ni, tiin a tarlang bawk.
Taiwan Defence Ministry pawhin thuchhuah siamin ralthuam te chu defence tih that nan bakah an chhehvel ralmuang zawka siam nana tul tiin a sawi bawk.
US Congress chuan Taiwan hnena ralthuam pek leh leitir tum hi duh se chuan a khap thei a, mahse, a khap ngai lo thung a. US sorkar chu nasa zawka Taiwan humhim leh chhan a nih theihna lama chet la turin a nawr zawk a ni.
US chuan kum tam tak chhung Taiwan hnenah hian ralthuam pein a leitir tawh a, mahse chungte chu amah a inven nana tih vek niin mahse US chuan Taiwan sorkar chu pawm lo thungin Beijing chauh official-in a pawm thung.
Chinese Foreign Ministry spokeswoman Mao Ning chuan China chuan US-in Taiwan hnena ralthuam a leitir chu an duh lo takzet tiin a sawi nghal thung a.
“United States hian Taiwan Strait boruak tiderthawng thei zawnga chetlakna a tihtawp a ngai a ni,” tiin a sawi zui thung.
June thla khan US Secretary of State Antony Blinken chuan Beijing tlawhin chutah chuan US chuan Taiwan chungchangah engmah China kalha chetlakna neih a tum loh thu a sawi thung.
Nikum chhung khan US lawmaker tena Taiwan an tlawh duh lovin China chuan Taiwan Strait velah tum hnih lai military exercise a neih luih phah tawh bawk a ni.