US-in Yemen-a pem awmna a kahnaah mi 68 thi
Yemen hmarthlang lam, Houthi-ten an awp china detention centre chu US thlawhnaten kapin African pem lut mi 68 an thi niin an pawl TV channel-in a puang.
Al Masirah hian Saada province laili beihnaah hian pem 47-in hliam an tuar a, thenkhat chu an na hle niin a puang a. Thlalak an tihlanah chuan in chim chhe karah ruang eng emaw zat awm a lang.
US sipaite chuan engmah an la sawi ve lo.
US Central Command chuan a hma lawkin President Donald Trump-a thupekin thlawhna hmangin Houthi-te hi March 15 atang khan vawi 800 chuang an kah tawh thu a puang thung.
An beihnaah hian ‘Houthi fighter za tel leh an hruaitu thahnem tak’ an thi niin a sawi a, heng zingah hian missile leh drone programme buaipuite pawh an tel niin an sawi.
Houthi thuneitute chuan civil mi tam tak an thi tel tih an sawi a, an pawl mi erawh tlem chauh an thi niin an sawi.
Saada-a migrant detention centre-ah hian Thawhtanni zing dar 05:00 (India-a zing dar 07:30)-a kah a nih lai hian African 115 an awm niin Al Masirah chuan a puang.
Thi zat hi chiang taka hriat theih ni lo mah se Al Masirah-in video a tihchhuahah chuan in chim tlusawp nuaih karah mipa ruang eng emaw zat chu hmuh theih a ni.
Houthi sorkara interior ministry chuan ‘rawng taka bomb thlak’ tiin a dem thu leh ‘indonaa dan bawhchhiatna’ chiang tak a nih thu a sawi.
UN hnuaia International Organisation for Migration (IOM) pawhin ‘Saada-a nunna hloh tak tam a awm tih sawi awm hi a pawi tak zet’ tih a sawi bawk.
Al Masirah hian a hma zan khan US thlawhnaten Houthi awp an khawpui, Saana an beihnaah mi dang pariat an thi bawk niin a puang.
Yemen-ah hian kum 11 zet buaina hrang hrang awmin ram rethei leh mihring khawsak harsatna hmun ni mah se Horn of Africa atangin mi tam tak an lut reng.
Kum 2024 ringawt pawh khan ram dang atangin mi 60,900 dawn lut an awm a, a tam ber hi Ethiopian leh Somali an ni.
Pem lutte hi Saada-a mi ang chi detention centre-ah hian sang tam tak dah an ni a, an zat chiah erawh hriat theih an ni lo.
US-in Yemen-a pem awmna a kahnaah mi 68 thi
Get real time updates directly on you device, subscribe now.
Next Post