US leh China ten inremna an siam fel thei

US chuan COP28 Summit Dubai a neih hma lawkin China nen inremna an siam theih tak thu Washington’s climate envoy chuan a sawi.
“Kan inbiakna te a hlawhtlingin kan hria a. Inremna thenkhat kan siam thei a ni,” tiin John Kerry chuan Singapore-a business summit neihnaah a sawi a.
A kimchang chu a remchan hunah kan la inhrilh chiang ang, tiin John Kerry chuan a sawi bawk.
Khawvela polluter lian ber ram pahnih tena inremna an siam thei hi COP28 neihna tur atana thil pawimawh tawpa ngaih a ni a.
Kerry leh Chinese hotu Xie Zhenhua te chu California ah ni li zet inbiakna an nei a. Heng inbiakna an neihah te hian thil harsa leh khirhkhan tak tak te an sawi dun a ni.
John Kerry chuan US cliamte policy leh technology te chu ‘anti-China’ a ni lo tiin a sawi bawk a.
“Khawvel ram dang ang bawkin China chuan technology thar avangin hlawkna a nei a ni. Chu chu siam kan tum mek zel a ni a. Ram tin mai Germany atanga France leh ram dang te pawhin tih an tum vek a ni a. Chak zawka hma kan lak a ngai bawk,” tiin a sawi.
COP28 chu 30 November atanga 12 December inkar chhungin neih a ni dawn a, global temperature sanna 1.50C aia sang lova dah chu thil tum ber niin hei hi kum 2015 daih tawh khan khawvel ram 200 chuangin Paris khawpuia inremna an lo siam tawh a ni.
Dubai inhmuhkhawmna neih turah hian ram hausa tena hmalakna kal pel tura ram rethei zawk te hnena zangnadawmna an pek dan tur inhnialna nasa tak siam chu ngaihven hlawh ber a ni bawk a.
US leh developed ram te chuan heng climate change dona kawnga fund ram rethei zawk tena an ngiatah hlauhthawnna an nei bawk.