Pathianni khan 2024 Copa America thlengtu United States chuan Bolivia lakah tournament Group C bul tanin AT&T stadium, Texas-ah sihnih faiin hnehna an chang a; Christian Pulisic leh Folarin Balogun-te’n goal an khung.
US coach Gregg Berhalter chuan game hmasabera hnehna chan nghal hi team tan a pawimawh tih sawi chungin an khelh dana hmasawn an la ngaihna lai an sawiho pah reng tih a tarlang tel.
Bolivia kha Copa America match an khelh hnuhnung vawi 31-a vawikhat chiah chak zo an ni.
Pulisic khan ram tan game 69-ah goal 30 a thun tling ve ta a, May 2016 daih tawha Bolivia laka a thun kha international goal a khung hmasakber a ni.
US hian Ninganiah CONCACAF lama an elpui thin Panama an su zui leh dawn a; Bolivia-in Uruguay an hmachhawn thung ang.
Pathianni Group C inkhel dang Florida lamah Maximilian Araujo, Darwin Nunez leh Matias Vina-te goal hmangin Uruguay-in Panama lakah 3-1 hnehna an chang a, United States nen an group-ah point thum ve ve an hum.
Marcelo Bielsa team Uruguay hi Copa America-a team hlawhtlingber pakhat zawk niin, vawi 15 champion thei awmchhun pahnih zinga a pakhat zawk an ni.
Pathianni inkhelah khan Uruguay tana goal thun hnember ni mek kum 37-a upa Luis Suarez chu lut loin bench lamah a thu tluan.
US leh Uruguay chak nghal
Get real time updates directly on you device, subscribe now.
Prev Post
Next Post