US Open-a Briton player-te bihchianna tawi

Thawhtanni atanga khelh tan tawh tur US Open main draw-a intum tur tihfel tawh niin, Britan chhuanvawr Emma Raducanu chuan women’s singles first round lamah amah ang bawka Grand Slam winner ni ve tawh Sofia Kenin a tum dawn a, kum hnih chhunga US Open a khelh vawikhatna tur a ni.
Briton hian tleirawl mai a la nih lai kum 2021 khan qualifier ni chungin Flushing Meadows-ah hian hard court grand slam title a lo hlawhchhuak nawlh tawh a, British hmeichhe zinga kum 44 chhunga major singles title la thei hmasa ber a nih avangin a khua leh tuite’n an hlut hle a, mahse, kha mi hnu khan hliam neuh neuhin a tibuai zui ta tlat a, grand slam tournament-ah inlan loh mai mai a ching a, a chhuah chhunah pawh rei a dam mawh ta khawp mai!
Kum 2022 khan defending champion niin pressure a zo lo deuh nge US Open first round paltlang zo loin a tla a; a banrek leh kheimit zai avangin nikum khan New York grand slam-ah hian a inlan thei lo bawk.
Kum 21-a upa Raducanu sut hmasakber tur American Kenin hi player tha tak niin, kum 2020-ah Australian Open lallukhum a chang a, kha mi kum vek khan French Open final a lut zui leh a, a chak zo ta lo.
Hmeichhe singles draw dangah British women’s number one leh 31st seedni bawk Katie Boulter-i tum tur chu qualifier tu emaw ber tih bak a la chiang lo a; Harriet Dart chuan Chloe Paquet of France lakah bul a tan ve thung ang.
Men’s draw lamah Jack Draper chuan Chinese Zhang Zhizhen a tum hmasaber dawn a, a tlang zel chuan final lut tura ngaih ngheh zinga mi Carlos Alcaraz nen third round-ah insut theihna ‘chance’ an nei.
British mipa zinga main draw atana qualifier khelh buai ngai loa direct entry hmu awmchhun Dan Evans chuan first round-ah 23rd seed Karen Khachanov of Russia a tum thung dawn a ni.
Briton kan hmuh tur dang rualkhat – Sonay Kartal, Lily Miyazaki, Billy Harris leh Jan Choinski tihte’n qualifying final round an khelh result tarlan hman a ni lo.