US Open champion hlui Raducanu tlo leh lo!

US Open champion hlui Raducanu tlo leh lo!
Mak takin kum 2021-ah US Open title a rawn chang nawlh a, a hnu lam eng tournament-ah mah chetfuh tak tak a nei hlei thei ta lo a, tunah pawh first round paltlang zo loin Thawhlehni khan tualchhung nula Sofia Kenin lakah 6-1 3-6 6-4-in a tla fel leh der tawh!
Tun kha tleirawl qualifier mai ni chunga Flushing Mewdows-a a champion hnua US Open a khelh leh vawihnihna chiah niin, Britain innghahna lian Raducanu hian kum 2022 pawh khan New York tournament lianah hian first round a paltlang zo lo tawh bawk.
Khati lai kha defending champion a nih lai a ni nghe nghe a, pressure sang lutuk a zo lo a ni ang e tih ngaihdan a pian theih laiin a hnu lam zelah pawh chetfuh tih ni a nei hlei thei ta lo a, hliamin a tihbuai vangte pawh ni pakhatin a lang.
American Kenin laka a tlawm hnuah Grand Slam tournament reng reng a hmachhawn hmaa match tam zawk khelh theih a duh tih Raducanu hian a sawichhuak.
Banrek leh kheimit hliam zaina atanga damkawr a nih avangin nikum US Open-ah a inlan thei lo a; Paris-a Olympic Games pawh hnuchhawnin, Toronto leh Cincinnati lama US Open inbuatsaihna WTA 1,000 event-ah pawh a inlan lo a, kumin July thla Wimbledon leh tun New York grand slam inkarah tournament vawikhat chiah a khel thei a, chu chu thla hmasa Washington-a quarter-final a thlen kha a ni.
Thawhlehniah Grand Slam champion hlui ve bawk Kenin hneh loin first round-ah a tla thum dawt a, inkhelh banah kum 21-a upa Briton chuan mittui tla chungin news conference a hmachhawn a, a lungngaiin, a hnual rawih rawih tih a sawichhuak!
American Kenin pawh khan kum 2020-ah Australian Open title lain, he mi kum vek hian French Open final a thleng bawk a, mahse, British number two Raducanu ang bawkin a hnu lamah chetthat a harsat chho ta tlat a, New York-ah hian major title a beisei zuina turah title la thei tura rinkai zinga mi Jessica Pegula a su leh dawn a, second round a luhna kawngah American sixth seed hian 6-4 6-3-in a chipui Shelby Rogers a hneh.
2018 US Open final-a Serena Williams ngei mai hneha a Grand Slam trophy hmasaber hlawhchhuaktu Naomi Osaka pawhin a first-round match-ah hnehna changin, Jelena Ostapenko lakah minute 63 lek chhunga 6-3 6-2 hnehna nen second round a lut.
Flushing Meadows-a vawihnih ngawt champion ve tawh Japanese hian New York pawn lamah Grand Slam title pahnih dang sualchhuak tawh bawkin, pasalte a han nei a, July 2023-a fanu Shai a hrin hnuah nikum khan US Open hi a khel thei lo a, kumin January thlaah khelmual (WTA Tour) rap leh tanin, kum 2018 leh 2020-a a champion-na hmunah kumin hian a kirleh a, Latvian 10th seed Ostapenko laka hnehna a chang lai hi a fanu chuan a hmunah a thlir ve nghe nghe.
World number one hlui Osaka hian hnehna a chan rualin a hmai chu rawmawlin a khuh a, a tap tih a hmuh theih a, on-court interview lamah pawh a la hnuhnang zui hle tih a hmuh theih a, tah loh a tum ngial thu a sawichhuak.
Tennis superhero ang maia khel tha chunga Ostapenko laka a hnehna sualchhuah kha kum li chhunga top 10 player a hneh vawikhatna niin, kum 26 mi hian French Open finalist Karolina Muchova lakah fiahna hautak zawk a hmachhawn zui leh ang.
Flushing Meadows, New York-a US Open women’s singles first round match dangah Thawhlehni vek khan top seed Iga Swiatek pawhin Russian lucky loser Kamilla Rakhimova lakah 6-4, 7-6(6) hnehna a sualchhuak hram a, Arthur Ashe Stadium-a hnehna chang turin darkar khat leh minute 52 zet hun a hmang.
Grand Slam title panga a lak tawh zinga 2022 US Open trophy chhiar tel thei reigning French Open champion Swiatek hian 6-3, 4-6, 7-6(6)-a Australian Daria Saville hnehtu Japanese Ena Shibahara a hmachhawn leh ang.