US Open final khel tur: Tualchhung nula Anisimova

Zanin US Open women’s singles final match-a defending champion Aryna Sabalenka hmachhawn thei turin American dam rei ber ni ta Amanda Anisimova chuan semi-final match pakhata a khingpui Naomi Osaka lakah 6-7 (4-7) 7-6 (7-3) 6-3 hnehna a sualchhuak.
Kum 23 mi American eighth seed hian set khatna hloh zet mah se beidawng loin set hnihna a la hram a, deciding set-ah erawh harsatna lian a tawk zui ta lo tlat a, kum 2002 laia sawi hlawh unau Serena leh Venus William hnu lama season khat chhunga Wimbledon leh US Open women’s singles final lut ve ve thei naupangber a ni.
Flushing Meadows, New York-a final a luh hma chiah kumin July thla Wimbledon final-ah khan Anisimova hi Iga Swiatek lakah chiang mangkhenin a tlawm a; a major final hmasaberah khan Pole lakah game khat lek pawh hui zo loin 6-0 6-0-in a zawr hnawp a; mahse, ni 54 hnu, US Open quarter-final match pakhatah phuba lain Swiatek hi 6-4, 6-3-in a hnehlet a, semi-final lamah pawh New York major title pahnih la tawh Japanese a paltlang zui leh ta zel a ni.
Osaka hneha final luh chu a tan engkima engkim a nih thu sawi chungin Anisimova chuan ‘dream come true’ a nih thu a sawi a, champion nih chu a beiseina ni mek mah se final a lut tawh hrim hrimin a tihphur takzet thu a tarlang tel.
Kum 114 chhung Wimbledon final-a hmeichhe zinga game khat mah la loa tlawm hmasaber a nih boruak kha inrintawkna hloh phahna tham a nih vei nen Anisimova hi chuan chawlhkar riat hnu lekah a rilru paukhauhzia lantirin Poland star lakah phuba tuiawm zet a la thei a, a zawnin Grand Slam final a lut zui a, Flushing Meadows-a a final khelh vawikhatna tur zanin hian eng result pawh sualchhuak thei dinhmunah a ding mek!
Rilru lama harsatna a tawh avangin thla sarih zet a chawl a, May 2023-ah chuan Anisimova hi WTA ranking lamah pawh world top 400 pawn lamah a tawlhchhuak hman hial a; kuminah erawh khawng takin a kirleh a, February thla khan a career-a title lian ber chu Qatar-ah a sualchhuak a, SW19-ah runner up ni zui lehin, top 10 huang a luah zui ta hial a ni.
Nimin semi-final match pakhat zawka chak zo ta lo Osaka pawh kha nau neih chawlh atanga a kir hlim January 2024 kha chuan world top 800 pawn lamah a awm leih leih chauh a; khelmuala a kirleh hnuah chak leh chak loh, chetthat leh chetchhiat a fawmkem ve reng a, mahse, tunhnai hard-court season rawn inherchhuakah hian a mar ta fu a, US Open final erawh a lut zo ta rih lo a ni.
Kum 27-a upa Japanese hian July thlaah a coach chhawr Patrick Mouratoglou banin, kum thum chhunga major title pali ngawt Swiatek lakpuitu Tomasz Wiktorowski hnuaiah a rawn kang tih loh theih a ni lo.