US Open hmeichhe lam

US Open hmeichhe lam
Inrinnia US Open 3rd round paltlang langsar zingah American 3rd seed Coco Gauff telin, Poland nula Magdalena Frech lakah 6-3 6-1 hnehna awlsam tak a sualchhuak a, 2023 champion tan 28th seed kha beih tham vak a ni lo!
A zawna kum li Flushing Meadows round of 16 a khelhna turah Ameican mihang nula kum 21 mi hian Australian 15th seed Daria Kasatkina hnehtu New York champion hlui Naomi Osaka of Japan a khel leh ang.
New York major title tum hnih hawn ve tawh Japanese Osaka hian US Open fourth round lut turin inkhel dangah Kasatkina chu 6-0 4-6 6-3-in a hneh.
Third round inkhel dangah Ukrainian 27th seed Marta Kostyuk pawhin set hmasaber hloh zet chungin world number 107 Diane Parry of France lakah 3-6 6-4 6-2 hnehna a chang a, last 16 lama a tum leh tur 13th seed Karolina Muchova of the Czech Republic chuan a chipui Linda Noskova chu 6-7 (5-7) 6-4 6-2-in a vaw tla ve bawk.
Arthur Ashe Stadium-a zan current eng hnuaiah Iga Swiatek a talbuai laih a, harsa taka set khatna a lak hnuah set hnihnaah pawh a dawk zur zur lo a, world number two hian Anna Kalinskaya chu Inrinni zan khan 7-6(2), 6-4-in a hneh hram.
Wimbledon winner Swiatek hi nikum Dubai-ah khan Russian 29th seed Kalinskaya lakah hian a lo tlawm ringawt tawh a, tuntum Flushing Meadows-ah pawh Russian nula hian a ngam ve laklawh tawh tlat a ni!
2022 US Open champion Iga Swiatek hi season kal lai Grand Slam bikah match 20 a chak tling chiah a, he thu buatsaih lai thleng hian kumina major match chak tam lamah US Open defending champion leh world number one ni bawk Aryna Sabalenka nen an intluk chiah.
Zan lam match pakhatah Brazilian seeded 18th Beatriz Haddad Maia chuan Greece star Maria Sakkari lakah 6-1 6-2 hnehna awlsam changin last-16 match pakhatah Wimbledon runner-up Amanda Anisimova a hmachhawn leh ang.