US Open hmeichhe third round lut tawhte

A zawna a kumlina atan world number one Iga Swiatek chuan Inrinni khan New York-ah last 16 a lut a, Russian nula Anastasia Pavlyuchenkova laka 6-4 6-2 hnehna nuamsa a chan hma lawkin inkhel entu ni tura US Open-a kirleh tennis great Serena Williams nen Arthur Ashe Stadium-ah an inhmu nghe nghe.
Kum 2022-a US Open title lo hlawhchhuak ve tawh top seed Swiatek hian23-time Grand Slam champion Williams nen players’ gym lama an inhmuh thu hi sawichhuakin, “Kei chuan va pan hmasa turin huaisenna ka nei hauh dawn lo a, amah zawk khan min lo pan hlauh mai a; tunhma lamin lo inhmu tawh mah ila ka tan chuan a hlawk dan a la ngai reng,” tiin Flushing Meadows-a vawiruk ngawt champion tawh Williams chuan nasa takin a fuihphur tih a sawi a, a eng zawnga thlirna a neihsan phah sawt tih a tarlang tel.
Tun kha kum hnih liamtaa professional tennis a chawlhsan hnua fan ni chunga US Open inkhel a en vawikhatna a ni.
Serena hian a career-ah New York tournament lian kha a thunun hneh hle thin a, 2022 tournament third round-a Australian Ajla Tomljanovic a hneh loh kha Flushing Meadows-a a match hnuhnungber a lo ni ve ta a ni.
Karliamta Inrinni khan a final match khelhna hmun Arthur Ashe Stadium-ah American hian Australian Chris O’Connell laka Italian number one Jannik Sinner chak lai a thlir a, American Jessica Pegula leh Spaniard Jessica Bouzas Maneiro inkhel a en bawk.
Swiatek game-ah kirleh ila, Pavlyuchenkova lakah khan nal zaihin inlan bawk mah se Grand Slam title panga la ve tawh Pole chuan hmasawnna tur a la neih thu a sawi.
Swiatek hian fourth round lamah Liudmila Samsonova a tum leh dawn a, Russian 16th seed hian third round inkhel dangah minute 62 lek chhungin American Ashlyn Krueger chu 6-1 6-1-in a sawp ve bawk a ni.
Inrinni 3rd round inkhel dangah home hope Pegula a chak thung a, 6-3 6-3-in Maneiro a hneh.
American sixth seed hian New York major tournament kal mekah set a la hloh lo a, kumina Grand Slam fourth round a luh vawikhatna chauh ni bawk mah se a chipui American mipui innghahna lian pakhat ni mekin, rising star Diana Shnaider nen quarter-final luh an inchuh zui leh dawn a ni.
Kum 20 mi Russian seeded 18th Shnaider hian round thumna inkhel dangah Italy player Sara Errani chu 6-2 6-2-in a hneh a, kumina a WTA Tour title hmasa pathum a lak theih avang leh Wimbledon third round a luh phak avangin WTA ranking lamah pawh a sang tawh viau a, US Open lamah tun hi a thlen leh tak avangin ranking tharah hmasawn zawngin a kal chho leh dawn a ni.
Inrinni vek khan Italian fifth seed Jasmine Paolini pawhin Kazakhstan nula Yulia Putintseva lakah 6-3 6-4 hnehna a chang. French Open leh Wimbledon runner-up Paolini hian kumin bika major tournament paliah chawlhkar hnihna a thleng fai ta vek a, two-time champion Naomi Osaka hnawtchhuaktu Karolina Muchova lakah fiahna dang a hmachhawn leh ang.
Kum 28 mi Paolini laka ding thei turin Czech Muchova hian 3rd round-ah 6-4 6-2-in Russian Anastasia Potapova a hneh.
Muchova hian nikum khan Flushing Meadows-ah hian semi-final lutin, banrek hliamin a tibuai zui ta a, zai hial a tawh avangin thla 1o zet a chawl nghe nghe.
Last 16 lut zingah Caroline Wozniacki pawh telin, France player Jessika Ponchet lakah 6-3 6-2 hnehna a chang a, kum zawnin New York-ah fourth round a lut.