US Open last 8 lut Swiatek
US Open last 8 lut Swiatek
World number one Iga Swiatek chuan hma sawn zelin, 16th seed Liudmila Samsonova laka 6-4 6-1 hnehna nuamsa nen US Open quarter-final a lut.
Kum 23 mi Pole tan tun hi Flushing Meadows-a last eight a thlen vawihnihna niin, a hmasa zawk chu kum 2022-a a champion tum kha a ni.
Five-time Grand Slam champion Swiatek hian vawiinah American sixth seed Jessica Pegula a hmachhawn leh ang.
America mipui innghahna lian Pegula hian last 16 inkhel dangah 6-4 6-2-in Russian nula Diana Shnaider a hneh a, a tum sarihna atan Grand Slam quarter-final lut mah se he stage hi tunhma lamin a la pel ngai lo a, kumin pawh hian champion tura rinkai zinga mi Swiatek nena semi-final luh inchuh tur an nih miau avangin a ekna ngaiah bawk su nen leh tura ngaih a ni rih phawt!
Unseeded Karolina Muchova pawh quarter-final lut zingah kan hmu a, rinkai zawk Italian fifth seed Jasmine Paolini lakah 6-3 6-3-in a chak teh tlat!
Chutia kan ti rual chuan Muchova hian nikum mai khan New York Grand Slam tournament-ah hian semi-final hial a lo thleng ve tawh ngat a, champion zui ta Coco Gauff a hneh lo a; 2023 French Open final-ah Swiatek hneh lo tawh bawkin, player chhia chu a ni lo chiang a, mahse, kumina French Open leh Wimbledon final khel pha ve ve khawpa kum hmang fuh kal mek kum 28 mi Paolini meuh vawtla tura beisei a ni lo a, chutih laiin a career-a a vawi rukna atan Czech Muchova hian Grand Slam quarter-final a thleng tlat a ni.
Muchova hian 22nd seed Beatriz Haddad Maia a hmachhawn leh dawn a, last eight lut turin Brazilian Maia hian last 16 inkhel dangah 6-2 3-6 6-3-in world number one hlui Caroline Wozniacki a hneh ve bawk.
Nikuma French Open semi-final lut kum 28-a upa Maia laka tlawm Dane Wozniacki kha kum 34 mi lai ni tawhin, US Open final tum hnih a khelh tawhah a chak zo lo ve ve a, a hun hnuhnung lama New York major title a beiseina pawh a thlawn leh ta rih a ni.
Haddad Maia kha kum 1968-a Brazil mipui beiseina siamsaktu Maria Bueno hnu lama Brazilian player zinga US Open women’s singles quarter-final lut leh thei hmasaber a ni.