Paralympics record siamtu Sumit

Paralympics record siamtu Sumit
Olympic Games-ah pawh India thatna ni mek men’s javelin throw chu Paris khuaa Paralympic Games kal mekah pawh India chungnunna a ni chhunzawm zel a, Thawhtanni khan khup veilam hnuai bul Sumit Antil chuan metre 70.59 zeta thui khawhin Paralympics men’s javelin throw title a kawl lai a humhim a, Paralympics record thar a siam zui nghal.
Javelin Throw F64 category gold medal awrhtu Antil hi India mipate zinga Paralympics gold humhim thei hmasaber leh India atanga chuti ang ti thei pahnihna a ni.
Kum 26-a upa Sumit Antil hi Haryana state-a Sonipat khaw tuiliak niin, kum thum liamta Tokyo-ah khan Paralympics inelna bika a khawh thui ber (68.55m) hmangin gold medal a hlawhchhuak a, Paris-ah Paralympics record thar a siam zui ta a ni.
Star javelin thrower Sumit hi world record holder ni bawkin, metre 73.29-a thui a khawh chu khawvelah khumtu an la awm lo a, mahse, rualbanlote intihsiak lianah chuan world record a siam tuma a khawh thui zawng hi a la pha ta chuang lo.
Reigning world champion Sumit hma hian shooter Avani Lekhara-i chuan Paris-ah vek hian a Paralympics title a kawl lai a lo humhim ve tawh bawk a, a chunga tarlan tawh ang khian Sumit hi Indian zinga he Games bika gold medal humhim thei pahnihna a ni.
Paris Paralympic Games kal laia India flag chawisangtu dang Avani hian kum thum liamta Tokyo Games-a yellow metal a sualchhuahna women’s 10m Air Rifle standing SH1 event-ah bawk gold medal a dawng nawn leh a, ti hian, Antil leh Avani hi Indian zinga Paralympics gold pahnih la thei awmchhun pathum zinga pahnih an ni ta.
Kum 22 mi Avani Lekhara hian nimin khan women’s 50m rifle 3 positions SH1 competition-ah final lut leh tawhin, a lo berah pawh silver medal a hmin.
Paralympics gold medal pahnih rut thei three-member club of Indians an tih zinga hmasaber chu Paralympics Committee of India president hna chelh mektu Devendra Jhajharia hi niin, 2004 Athens leh 2016 Rio Games-ah khan javelin throw F46 gold a lo awrh ve tawh a ni.
India medal dang
Paris 2024 Paralympics kal mekah hian bawp veilam nei lo Nitesh Kumar pawhin final-a a khingpui Daniel Bethell of Britain hnehin badminton men’s singles SL3 event-ah gold medal a hlawhchhuak ve tawh bawk.
Thawhtanni khan Porte de La Chapelle Arena, Paris, France-ah gripping men’s singles SL3 badminton final khelh niin, kum 29-a upa Haryana tlangval hian darkar khat leh minute 20 chhungin Tokyo silver medallist Bethell lakah 21-14, 18-21, 23-21 hnehna a chang a, a vawikhatna atan Paralympics medal a awrh.
Kum 15 mi lek a nih lai kum 2009 khan Visakhapatnam-a a chuanna rel chetsualnaah Kumar-a hian a bawp veilam a chan a, chu vanduaina chu inbawhbehtir mai loin ropuina’n a hmang ta a ni.
Kum thum liamta Tokyo Paralympics-ah khan a vawikhatna atan badminton hi Paralympic inelna pakhatah telh niin, India mi Pramod Bhagat chu SL3 gold la thei hmasaber a ni a, tunah a chipui Nitesh Kumar chuan SL3 category-a gold awm chu a rawn chang chhunzawm ve leh ta chat a ni.
Paris Paralympics-a India medal dang kan hmuh leh chu ban pahnih bul chunga thalkap mi Sheetal Devi leh wheelchair luahtu Rakesh Kumar-te bronze medal mak tak hi a ni.
Thawhtanni khan mixed team compound archery competition-ah Sheetal leh Rakesh tangdun hian semi-final lamah Iran pair Fatemeh Hemmati leh Hadi Nori ngam lo mah se bronze medal match-ah 156-155-a Italy pair Eleonora Sarti leh Matteo Bonacina hneh chungin Paralympic archery bika Indian zinga medal la thei pahnihna an ni.
Tokyo edition-ah khan thalkah atang hian Harvinder Singh chuan individual bronze a lo awrh ve tawh a; Paris-a rawn langsar leh pahnih zinga a hmeichhia zawk Sheetal hi Indian hmeichhe zinga archery medal hawn thei hmasaber a ni nghal.
Spinal cord injury avanga kal thei lo kum 39 mi Rakesh leh natna vang tak phocomelia an tih avanga ban nei lo tleirawl kum 17 mi Sheetal hian kumin Games kal laiah individual medal erawh an hlawhchhuak zo ta lo a ni.
Nishad Kumar pawhin Paralympics High Jump T47 silver medal awrhin, Indian mixed doubles para-badminton pair Nithya Sre Sivan leh Sivarajan Solaimalai tangdun kutah Thawhtanni khan bronze medal match a lut zo lo a; mixed doubles SH6 bronze medal match-ah Sivarajan-Nithya hi Indonesian pair Rina Marlina leh Subhan lakah 17-21, 12-21-in an tlawm.
He thu buatsaih lai thlengin India hian Paris Paralympics kal mekah medal 15 la tawhin, chu’ng zinga pathum chu gold medal a ni a, a dangte chu silver panga leh bronze medal pasarih a ni a, a pumpuiah 15-na an ni mek.
Kumin hi India-in Paralympics contingent a tirh len ber niin, infiamna (sports) chi 12 hmachhawn tur infiammi 84 tirhchhuah an ni a, Paris 2024 Paralympics hi he Games chanchina India medal beisei san berna a ni nghal bawk.
Tokyo 2020 kha Paralympic bika India hlawhtlin ber tum niin, gold panga, silver pariat leh bronze paruk nen a vaiin medal 19 a tling.