US Open men’s doubles: Bopanna-Ebden champion zo lo

US Open khelh zawh taka India title beiseina a thamral a, Zirtawpni men’s double final-ah Rohan Bopanna leh Matthew Ebden inkawp chuan Britain player Joe Salisbury leh Rajeev Ram of US tangdun hneh loin runners up trophy an lungawipui mai a ngai a, Bopanna tan men’s doubles Grand Slam title a nghah leh rih a ngai dawn.
Tun kha Bopanna tan major tournament men’s doubles final tum hnih a khelhna niin, a kawppui Australian player nen darkar hnih leh minute khat chhungin 6-2, 3-6, 4-6-in an tlawm a; an ngam loh Ram leh Sailsbury thawkdun kutah a zawna a vawithumna atan US Open title a lut.
Tarlan tawh angin, Bopanna khan a career-ah US Open final tum hnih khel tlingin, kumin hian kum 43 mi ni chungin title match a khel a, final khel thei upaber a ni nghal.
Kum 2010 daih tawh khan Pakistani player Aisam-ul-haq Qureshi nen tang-dunin final a lo chuangkai tawh a, khatih laia men’s doubles thununtu American phir unau legendary Bryan brothers an tih mai kha an ngam ta lo a ni.
A pumpuiah tun kha Bopana tan Grand Slam final tum thum a khelhna niin, a hmasaber kum 2017 kha major final-a a chak awmchhun la niin, khami tum khan a Canadian partner Gabriela Dabrowski nen French Open mixed doubles trophy an chawi.
Leander Paes leh Mahesh Bhu-pathi-te chu India mipate zinga Grand Slam title la thei dangte an ni.
Ningani khan Bopanna-Ebden hian straight-set hmanga French pair Pierre-Hugues Herbert leh Nicolas Mahut hnehin US Open men’s double final an lut a; kum 43 mi Bopanna hi Open era bikah Grand slam finalist upaber a ni.
Sixth seeded Indo-Australian pair hian kumin Wimbledon semi-final pawh kha khel tawhin, New York hard court major last four match-ah 7-6 (7-3), 6-2 hnehna an chang a; Bopanna hian tunhmaa grand slam final khel thei upaber ni reng thin Daniel Nestor of Canada record a khum a; Nestor khan kum 43 leh thla lia upa a nih laiin major final a khel a, Bopanna hian record ding lai hi thla hnihin a khum ta a ni.