US Open men’s singles draw: Sinner leh Alcaraz-te kalkawng

US Open men’s singles draw:
Sinner leh Alcaraz-te kalkawng
Ningania US Open draw tarchhuahah World No. 1 Jannik Sinner chuan first round-ah Czech Vit Kopriva a tum dawn.
Defending champion Sinner hian New York khaw major tournament atana inbuatsaihna hnuhnung ber Cicinnati Open final kha damlohna avangin a khel tluan thei lo a, hahdam zawkin a elpui Carlos Alcaraz khan title a lak phah a; Flushing Meadows-ah pawh anni pahnih hi final hmain an intum thei dawn lo a, a tawp khar leh tho tura beisei an ni mek.
Thawhtanni final a khel tluan thei lo a, US Open mixed doubles atangin a inhnukdawk bawk a, singles top seed Sinner-a hriselna hi la pan hle mah se first round khel chhuak tura a dam a nih chuan tlang tura ngaih a ni phawt.
Kumin Australian Open leh Wimbledon-a a champion nen belhkhawma Grand Slam title pali la tling ve tawh Sinner hi a tlang zel a nih chuan quarter-final match pakhatah fifth seed Jack Draper nen an insu thei dawn a; a chak a nih chuan third seed Alexander Zverev nen semi-final match pakhat zawkah an intum leh thei ang a, final a lut ve a nih chuan Alcaraz nen bawk a hmawr bawkin trophy an inchuh leh thei dawn a ni.
Reigning French Open champion Alcaraz chu Sinner-a awm lohna draw bung lehlamah awmin, first round-ah American Reilly Opelka a a tum dawn a; a final kalkawngah an tlangho zel a nih chuan quarter-final stage-ah Ben Shelton nen an intawng thei dawn a, semi-final pakhat zawkah fourth seed Taylor Fritz nen an inhmachhawn thei bawk ang.
New York khaw tournament liana vawi li champion tawh Novak Djokovic chu seeded seventh niin a inlan dawn a; a bultanna inkhelah Learner Tien tumin, fourth round-ah Frances Tiafoe nen an insu thei dawn a; quarter-final lamah fourth-seeded Fritz hmachhawn theiin, final lut tutin Alcaraz a suttlang a ngaih hmel!
Women’s draw lamah top seed Sabalenka chuan Rebeka Masarova tum chungin bul a tan ang a; quarter-final match-ah Cincinnati finalist Jasmine Paolini leh semi-final lamah Jessica Pegula a hmachhawn thei dawn a ni.
Wimbledon champion Iga Swiatek chuan Cincinnati hnehna a chan hnuah a taksate pawh a lo hahdam leh hman tawh tura ngaih a ni a, quarter-final chu thleng turah beisei ila, tah chuan Amanda Anisimova nen inhmachhawn tura beisei an ni.
Third seed ni chunga inlan tur French Open champion Coco Gauff chuan sixth seed leh a chipui ni bawk American Madison Keys chu quarter-final-ah a tum thei dawn a, kumin Australian Open champion hi a paltlang zo a nih chuan Swiatek nen intawng leh thei tur zawngin draw a kal.